Blóðug átök í Mjanmar

Mótmælt var í fjölda borga og dreifðist mannfallið á þær, dauðsföll hafa verið tilkynnt í Yangon, Dawei og Mandalay en lögregla hefur beitt skotvopnum og táragasi gegn mótmælendum.

Yfirvöld höfðu varað mótmælendur við því að harðar yrði tekið á andófi um helgina og á laugardag var látið til skarar skríða eftir margra vikna mótmæli, sem að mestu leyti hafa verið friðsöm, með nokkrum undantekningum þó.

Auk þeirra átján sem létu lífið eru að minnsta kosti þrjátíu særð að því er mannréttindaskrifstofa Sameinuðu þjóðanna segir, en erfiðlega gengur að fá áreiðanlegar fréttir frá landinu.