Takmarka fjárfestingarstarfsemi viðskiptabanka

Lögunum er sagt ætlað að hrinda í setja skýrari mörk á milli viðskipta- og fjárfestingarbankastarfsemi.

Hámark á stöðutöku kerfislega mikilvægra viðskiptabanka og sparisjóða í fjármálagerningum og hrávörum verður sett á með gildistöku laga um varnarlínu milli viðskipta- og fjárfestingarbankastarfsemi.

Í tilkynningu frá fjármálaráðuneytinu kemur fram að lögunum sé ætlað að takmarka áhættu innistæðueigenda og ríkisins af fjárfestingarbankastarfsemi viðskiptabanka og sparisjóða. Bjarni Benediktsson, fjármálaráðherra, lagði frumvarpið fram.

Í kjölfar bankahrunsins árið 2008 var mikið rætt um hvort rétt væri að skilja að viðskipta- og fjárfestingarbankastarfsemi. Frumvarpið sem varð að lögum í dag er sagt hrinda í framkvæmd einni af megintillögum hvítbókar um framtíðarsýn fyrir fjármálakerfið sem var gerð að beiðni ráðuneytisins árið 2018.

Með lögunum eru fjárfestingar banka fyrir eigin reikning takmarkaðar við tiltekið hlutfall af eiginfjárgrunni þeirra. Samanlögð eiginfjárþörf viðskiptabanka eða sparisjóðs má þannig ekki vera umfram 15% af eiginfjárgrunni hans.

Ráðuneytið segir að lögin um varnarlínuna séu á meðal fjölmargra breytinga sem samþykktar hafa verið á undanförnum árum sem ætlað sé að bæta regluverk á fjármálamörkuðum. Þannig hafi kröfum um magn og gæði eigin fjár verið gerbreytt, bönkum verið gert óheimilt að lána með veði í eigin bréfum, ríkari kröfur gerðar til hæfni stjórnenda banka og fjármálaeftirlit verið stóreflt svo nokkur dæmi séu tekin.