Segja það hafa verið mistök að greiða Rúmenunum

Efling lýsti því yfir í dag að Ábyrgðasjóður launa hefði fallist á að greiða vangreidd laun til fjögurra félagsmanna sem unnu hjá Eldum rétt, á vegum starfsmannaleigunnar Menn í vinnu. Þar væri um að ræða fjórar greiðslur á bilinu 120 til 195 þúsund krónur.

Sjá einnig: Starfsmennirnir fá borgað í „óvæntri vendingu“

Kröfurnar voru til komnar vegna frádráttar af launum félagsmannanna fjögurra. Efling hélt því fram að sá frádráttur hefði verið ólögmætur í málshöfðun gegn Eldum rétt og Menn í vinnu en í dómi héraðsdóms frá því í síðasta mánuði kom fram að félagsmennirnir fjórir, sem eru frá Rúmeníu, hefðu skrifað undir ráðningarsamning þar sem fram kom að hægt væri að draga frá launum þeirra kostnað MIV vegna flugmiða til Íslands, ógreiddrar leigu og annars.

Máli Eflingar var vísað frá dómi og stéttarfélaginu gert að greiða fjórar milljónir í málskostnað.

Í tilkynningu frá Eflingu sagði að Ábyrgðasjóður launa hefði með greiðslunum viðurkennt að frádrátturinn hefði verið ólögmætur og því ætlaði Efling ekki að áfrýja dómi Héraðsdóms Reykjavíkur.

Í yfirlýsingu frá Vinnumálastofnun segir að stofnunin hafi enga afstöðu tekið til málaferlanna.

Kröfurnar hafi verið afgreiddar í samræmi við samþykki skiptastjóra þrotabús Menn í vinnu sem lá fyrir síðasta haust. Tilefni hafi verið til að endurskoða þá afgreiðslu vegna dóms héraðsdóms og það hafi verið yfirsjón að gera það ekki.