Draga ekkert undan en ljúga helling

Verkið fjallar um raunveruleika íslenskra kvenna; um vonir og drauma, biturleika og frú-strasjónir, uppeldi, kvíða og hvítvín. Þær Björk, Salka Sól og Selma byggja verkið á sinni eigin reynslu og draga ekkert undan en ljúga helling, segir í tilkynningu. 

„Þetta er verk um íslenskar konur, samið af íslenskum konum og fyrir íslenskar konur, hinsegin, kynsegin og allar hinar (og fyrrverandi, núverandi og tilvonandi maka sem þora að koma).“ 

Allar eru þær Salka Sól, Selma og Björk þekktar fyrir störf sín í leikhúsi á síðustu árum. Salka Sól sló fyrst í gegn sem söngkona og nú síðast sem Ronja ræningjadóttir. 

„Hún er ein allra vinsælasta og hæfileikaríkasta listakona landsins um þessar mundir,“ segir í tilkynningu frá Gaflaraleikhúsinu.

„Selma Björns hefur verið ástmögur þjóðarinnar frá því hún var í Grease og svo stimplaði hún sig rækilega inn sem stórstjarna í Söngvakeppninni. Hún hefur leikstýrt stórsýningum á borð við Vesalingana á undanförnum árum og leikið á sviði og í sjónvarpsþáttum en leikur hér sitt stærsta hlutverk til þessa.“

Flestar Grímur

„Björk sló rækilega í gegn með einleik sínum Sellófon hér um árið sem var settur upp í 19 löndum víða um heim. Hún hefur síðan þá skrifað og leikstýrt stórsmellum á borð Blakkát og Mömmu klikk! auk þess að vera leikhússtýra Gaflaraleikhússins. Hún snýr loksins aftur á svið sem leikkona í Bíddu bara.“

Þær Salka Sól, Selma og Björk leika sumsé öll aðalhlutverk, aukahlutverk, kvíðaverk og smáhlutverk í sýningunni auk þess að flytja „snilldarlega helling af frábærri, nýrri tónlist“.

Stallsysturnar skrifa og leika í verkinu en semja auk þess lögin í verkinu í félagi við Karl Olgeirsson. 

„Gullfalleg og oft á tíðum bráðfyndin lög - og texta.“ 

Leikstjórn er í höndum Ágústu Skúladóttur, „fyndnasta leikstjóra landsins sem er sá leikstjóri á Íslandi sem hefur hlotið flestar Grímur“. 

Þórunn María Jónsdóttir sér um búninga og leikmynd í Gaflaraleikhúsinu í fyrsta sinn og Freyr Vilhjálmsson sér um ljósahönnun eins og hann hefur gert í undanförnum sýningum leikhússins.

Frumsýning verður þann 9. apríl í Gaflaraleikhúsinu en miðasala er hafin á tix.is og Gaflaraleikhúsinu.