Fá­heyrð aukning á hita­vatns­notkun hafði á­hrif á rekstur OR í fyrra

Þetta kemur fram í nýbirtum ársreikningi OR samstæðunnar. Heildarafkoma samstæðunnar sem samanstendur af móðurfélaginu, Veitum, Orku náttúrunnar, Gagnaveitu Reykjavíkur og Carbfix dróst hins vegar saman um 61,7% milli ára og var 8,8 milljarðar króna í fyrra samanborið við 23 milljarða árið 2019. 

Samkvæmt efnahagsreikningi námu eignir samstæðunnar 394,1 milljarði króna í árslok og voru 369,8 milljarðar árið 2019. Eigið fé nam 188,1 milljörðum króna í árslok en 182,3 milljörðum undir lok ársins 2019 og er eiginfjárhlutfall samstæðunnar nú 47,7% samanborið við 49,3%.

Fáheyrð aukning á hitavatnsnotkun

Í tilkynningu frá Orkuveitunni segir að köld tíð og fjölgun húsa sem tengd eru hitaveitu hafi ollið um 10% vexti heitavatnsnotkunar milli áranna 2019 og 2020 sem sé fáheyrð aukning á einu ári. Framlegð rekstursins (EBITDA) og rekstrarhagnaður (EBIT) voru meiri á árinu 2020 en 2019 en heildarniðurstaða ársins var jákvæð um ríflega 5,6 milljarða króna samanborið við 6,9 milljarða árið áður.

„Fjárhagsleg og menningarleg endurskipulagning samstæðu Orkuveitu Reykjavíkur undanfarinn áratug hefur skilað okkur því að nú getum við lagt lóð á vogarskálarnar þegar kemur að viðspyrnu gegn kórónuveirunni og áhrifum hennar á samfélagið. Reksturinn er traustur, afkoma fyrirsjáanleg og við höfum getað lækkað gjaldskrár vatnsveitu og rafveitu umtalsvert síðustu ár. Gjöld fyrir hitaveitu og fráveitu hafa nánast fylgt verðlagi á sama tíma,“ segir Bjarni Bjarnason, forstjóri OR, í tilkynningu.

Dregið úr ábyrgðum sveitarfélaganna

Stjórn OR hyggst gera tillögu um fjögurra milljarða króna arðgreiðslu í ár og hafa neyðarlán eigenda sem eru Reykjavíkurborg, Akraneskaupstaður og Borgarbyggð til OR vegna hrunsins verið greidd að fullu.

„Það skiptir líka máli, nú þegar ríki og sveitarfélög eru að glíma við samdrátt vegna kórónuveirunnar, að verulega hefur dregið úr ábyrgðum sveitarfélaganna sem eiga Orkuveituna á lánum hennar. Síðasta áratuginn hefur hlutfall lána með slíkum ábyrgðum minnkað úr rúmum 90% í 46%. Við stefnum að því að hætta alveg lántöku með ábyrgðum eigenda. Þá hefur OR nú greitt að fullu neyðarlán sem eigendur veittu fyrirtækinu árið 2011 að fjárhæð 12 milljarðar króna. Skattaspor samstæðunnar fyrir síðasta ár hefur verið reiknað. Það nam 8,8 milljörðum króna. Við erum stolt af rekstri sem skilar slíkum fjárhæðum til samfélagsins.,“ er haft eftir Bjarna.