NBA dagsins: Framlenging í Denver, Boston basl og sigurganga Spurs

Denver Nuggets þurftu að hafa fyrir hlutunum þegar Chicago Bulls komu í heimsókn. Allt var jafnt þegar leik lauk og því þurfti að grípa til framlengingar. Strákarnir frá Denver reyndust þar sterkari, og lönduðu fjögurra stiga sigri, 127-131.

Jamal Murray var stigahæstur fyrir heimamenn með 34 stig, ásamt Nicola Jokic sem skoraði einnig 34. Ásatm því tók Jokic 15 fráköst og gaf níu stoðsendingar.

Vandræði Boston Celtics halda áfram, en þeir hafa nú tapað þremur leikjum í röð eftir heimsókn Sacramento Kings. Lokatölur 107-96 og Celtics í áttunda sæti Austurdeildarinnar.

San Antonio Spurs gerðu góða ferð austur þegar þeir unnu Cleveland Cavaliers 116-110. Keldon Johnson skoraði 23 stig fyrir San Antonio og tók hvorki meira né minna en 21 frákast. San Antonio menn eru nú í sjöunda sæti Vesturdeildarinnar, aðeins einu sæti frá öruggu sæti í úrslitakeppni.