Viðskipti innlent

Ævintýraleg öflun verðmæta á skömmum tíma á loðnuvertíð

Kristján Már Unnarsson skrifar
Skip Síldarvinnslunnar, Beitir NK 123, siglir inn til Norðfjarðar að lokinni loðnuvertíð.
Skip Síldarvinnslunnar, Beitir NK 123, siglir inn til Norðfjarðar að lokinni loðnuvertíð. Einar Árnason

Það er óhætt að tala um loðnuævintýri miðað við útflutningsverðmæti síðasta loðnufarms fiskiskipsins Beitis, sem reyndist 650 milljónir króna. Það tók áhöfn skipsins aðeins átta klukkustundir að ná aflanum um borð.

Í fréttum Stöðvar 2 var greint frá fimmtu og síðustu veiðiferð Beitis á loðnuvertíðinni, sem var í Faxaflóa þann 6. mars síðastliðinn eftir sólarhrings siglingu á miðin frá Norðfirði. Áhöfnin byrjaði á því um hádegisbil að fá loðnu gefins úr nót tveggja annarra skipa en kastaði svo sjálf þrisvar á torfuna.

Svo vildi til að fyrsta beina sjónvarpsútsending frá fiskimiðum hérlendis var einmitt frá þessum túr Beitis:

Þetta var á þeim tíma sem loðnan var komin á sitt verðmætasta skeið, orðin hrognafull.

„Hún er komin á steypirinn,“ sagði Sturla Þórðarson skipstjóri.

Átta klukkustundum síðar voru 2.200 tonn komin í lestar skipsins.

Sturla Þórðarson skipstjóri í brúnni á Beiti.Sigurjón Ólason

„Strákar. Við erum hættir,“ kallaði skipstjórinn í talstöðina. „Þar með er loðnuvertíð lokið.“

Við tók sólarhrings sigling til baka til Norðfjarðar. Verðmæti farmsins upp úr sjó reiknaðist 244 milljónir króna, sem gaf hásetahlut upp á þrjár og hálfa milljón króna, samkvæmt upplýsingum Síldarvinnslunnar.

Þar fór farmurinn í hrognavinnslu, þar margfölduðust verðmætin en kavíarinn er langdýrasta afurð loðnunnar. Loks pökkuðust hrognin í umbúðir fyrir Japansmarkað.

Þegar búið var að gera upp allt dæmið reyndist útflutningsverðmæti þessa eina loðnufarms Beitis vera um 650 milljónir króna.

Smári Geirsson er fyrrverandi forseti bæjarstjórnar Fjarðabyggðar.Einar Árnason

„Og síðan smitar þetta út frá sér um allt samfélagið,“ sagði Smári Geirsson, söguritari Síldarvinnslunnar.

„Þannig að það er ákveðinn spenningur hér í kringum það hvort verður loðnuvertíð eða ekki. Það skiptir mjög miklu máli.“

Fjallað var um lífið á loðnuvertíð í þættinum Um land allt í kvöld. Hér má sjá frétt Stöðvar 2:

Sjávarútvegur Fjarðabyggð Efnahagsmál

Tengdar fréttir

Höfum öll ofboðslega gott af því að finna hvað heldur okkur gangandi

„Það er bara gaman að vinna á vertíð. Það eru vaktir. Það er fjör. Þú finnur það að þú ert að bjarga verðmætum og að þetta skiptir máli. Ég held að við höfum öll bara ofboðslega gott af því að vera svona með puttann á púlsinum á því hvað heldur okkur gangandi,“ segir Íris Róbertsdóttir, bæjarstjóri í Vestmannaeyjum, um eigin reynslu af því að vinna á loðnuvertíð.

Segir loðnuvertíðina stóran lottóvinning fyrir þjóðarbúið

Núna er áætlað að loðnuvertíðin skili yfir tuttugu milljarða króna útflutningsverðmætum. Þetta kom fram í viðtali við Gunnþór Ingvason, forstjóra Síldarvinnslunnar í Neskaupstað, en þangað var Börkur NK í kvöld á leið með síðasta loðnufarm Austfjarða á þessari vertíð, 1.900 tonna farm. Þá virðist einungis Ísfélag Vestmannaeyja eiga eftir um þúsund tonn óveidd af sínum kvóta.

Loðnu­ver­tíðin á loka­metrunum: „Ævin­týra­legt fis­kerí“

„Þetta er eiginlega búið að vera ævintýralegt fiskerí,“ sagði fréttamaðurinn Kristján Már Unnarsson í kvöldfréttum Stöðvar 2 í kvöld þar sem hann var staddur um borð í Beiti NK-123. Veiðin hefur gengið vel og er Beitir kominn með næstum 1.500 tonn.



Mest lesið


Fleiri fréttir

Sjá meira


×

Mest lesið