Sebastian: Svekkjandi að tapa fyrsta leiknum á heimavelli

„FH vann verðskuldaðan sigur, við náðum aldrei að spila vörn í kvöld sem er hrikalegt,“ sagði Sebastian Alexandersson þjálfari Fram.

Basti var afar ósáttur með að fá á sig 34 mörk á heimavelli og var svekktur með vinnuframlag liðsins.

„Við náðum sjaldan að brjóta á þeim, FH skoraði mikið úr þeim svæðum sem við töluðum um að loka á fyrir leik, við höfum okkur engar málsbætur þar, FH spilaði okkur sundur og saman sem skilaði fáum vörðum boltum í þokkabót,“ sagði Basti sem var svekktur með að fá á sig 34 mörk.

Fram skoraði 30 mörk í leiknum og gátu þeir horft jákvæðum augum á spilamennsku sína í sókn. 

„Það er ekki auðvelt að skora 30 mörk á móti FH, að skora svona mörg mörk á að duga til að vinna leik. Margir leikmenn skiluðu góðu framlagi,“ sagði Basti.

„Ég er afar svekktur með að hafa tapað í fyrsta sinn á heimavelli, við ætluðum að verja heimavöllinn okkar með kjafti og klóm sem klikkaði í dag, næsti leikur er heimaleikur á sunnudaginn og ætlum við að svara fyrir þetta þar.“

Basti sagði að lokum að liðið verður að skerpa á varnarleiknum sínum á sunnudaginn.

„Við höfum byggt liðið upp á vörn og markvörslu. Mér var tjáð þegar ég tók við liðinu að það væri ekki hægt að laga sóknarleikinn í þessu liði en núna er það eina sem virkar sem er löðrungur í andlitið.“

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.