Gylfi, Jóhann Berg og Alfreð ekki með en tíu nýliðar í landsliðshópnum

Ingvi Þór Sæmundsson skrifar 21. maí 2021 15:48

Gylfi Þór Sigurðsson verður ekki með í vináttulandsleikjunum þremur. vísir/vilhelm

Arnar Þór Viðarsson valdi 34 leikmenn í íslenska landsliðshópinn sem mætir Mexíkó, Færeyjum og Póllandi í vináttulandsleikjum um mánaðarmótin. Sterka leikmenn vantar í íslenska hópinn eins og Gylfa Þór Sigurðsson, Jóhann Berg Guðmundsson og Alfreð Finnbogason.

Tíu nýliðar eru í íslenska hópnum: Elías Rafn Ólafsson, Patrik Sigurður Gunnarsson, Brynjar Ingi Bjarnason, Hörður Ingi Gunnarsson, Ísak Óli Ólafsson, Kolbeinn Þórðarson, Rúnar Þór Sigurgeirsson, Valgeir Lunddal Friðriksson, Gísli Eyjólfsson og Þórir Jóhann Helgason.

Átta leikmenn úr Pepsi Max-deildinni eru í hópnum: Brynjar Ingi, Hörður Ingi, Ísak Óli, Rúnar Þór, Gísli, Þórir Jóhann, Birkir Már Sævarsson og Kári Árnason.

Ellefu leikmenn í hópnum verða ekki með í leiknum gegn Mexíkó í Texas 29. maí en koma inn í íslenska liðið fyrir leikinn gegn Færeyjum í Þórshöfn 4. júní. Íslendingar mæta svo Pólverjum í Poznan 8. júní.

Ljóst er að ekki mun allur hópurinn sem mætir Mexíkó ferðast í leikina við Færeyjar og Pólland og verður tilkynnt eftir leikinn við Mexíkó hvaða leikmenn verða ekki með gegn Færeyjum og Póllandi.

Viðar Örn Kjartansson er í hópnum en hann var ekki valinn fyrir síðustu leiki landsliðsins eins og frægt var.

Meðal annarra fastamanna sem eru fjarverandi að þessu sinni má nefna Gylfa, Jóhann Berg, Alfreð, Hannes Þór Halldórsson, Sverri Inga Ingason, Arnór Sigurðsson, Guðlaug Victor Pálsson, Ara Frey Skúlason og Hörð Björgvin Magnússon.