Eliza Reid opnar herferð þakklætis

Verndari verkefnisins er Eliza Reid forsetafrú en herferðin sýnir þakklætið sem þjónustuþegar Ljóssins finna til þeirra sem styðja Ljósið, svokallaðra Ljósavina. 

„Ljósavinir eru lykilþáttur í rekstri Ljóssins og við finnum fyrir svo ótrúlega miklu þakklæti til þeirra frá þeim einstaklingum og aðstandendum sem nýta sér þjónustu Ljóssins. Því fannst okkur kjörið að það yrði kjarninn í herferðinni.“ segir Sólveig Kolbrún Pálsdóttir, kynningarstjóri Ljóssins. 

Ljósið er endurhæfingarmiðstöð fyrir krabbameinsgreinda en einnig veitir Ljósið aðstandendum stuðning og fræðslu. Í maí 2021 sóttu tæplega 600 manns þjónustu í Ljósið. 

„Sá fjöldi sem til okkar sækir endurhæfingu eykst með hverjum mánuðinum. Við erum sífellt að þróa þjónustuleiðir og –framboð og treystum í þeirri vinnu áfram á grasrótina í Ljósinu, Ljósavinina, sem stutt hafa dyggilega við bak okkar. Þeir hafa aldrei verið mikilvægari.“ segir Erna Magnúsdóttir, stofnandi Ljóssins. 

Leikstjóri herferðarinnar er Ninna Pálmadóttir, en hún nam leikstjórn í NYU Tisch School of the Arts, og hlaut hún Edduna fyrir myndina Paperboy. Herferðinni verður ýtt úr vör af Elizu Reid í húsnæði Ljóssins, Langholtsvegi 43. 

Hægt er að gerast Ljósavinur á vefslóðinni www.ljosid.is/ljosavinur