Fótbolti

Skýrist fyrir hvaða lið þriðja sæti dugar: Veik von Finna en Úkraína gæti þraukað

Sindri Sverrisson skrifar
Oleksandr Zinchenko, stjarnan í úkraínska landsliðinu, veit ekki enn hvort hann fær að spila fleiri leiki á EM. Það skýrist í dag.
Oleksandr Zinchenko, stjarnan í úkraínska landsliðinu, veit ekki enn hvort hann fær að spila fleiri leiki á EM. Það skýrist í dag. Getty/Stanislav Vedmid

Finnar og Úkraínumenn munu fylgjast spenntir með gangi mála á EM í dag þegar riðlakeppninni lýkur með leikjum í E- og F-riðli. Úrslitin í riðlunum ráða möguleikum Finnlands og Úkraínu á að komast í 16-liða úrslit og er óhætt að segja að vonir Úkraínu séu talsvert meiri.

Á EM í fótbolta eru 24 þjóðir sem spila í sex riðlum. Tvö efstu lið hvers riðils komast í 16-liða úrslit og svo fjögur lið með bestan árangur í 3. sæti. Hvert stig og hvert mark getur því skipt máli fyrir liðin sem enda í 3. sæti.

Keppni er lokið í fjórum riðlum og eru Tékkland og Sviss örugg um sæti í 16-liða úrslitum þrátt fyrir að hafa endað í 3. sæti D- og A-riðils. Spurningin er hvaða tvö önnur 3. sætis lið komast einnig áfram.

Nóg fyrir Úkraínu að Spánn vinni og Pólland vinni ekki

Finnland er í verstri stöðu liðanna sem endað hafa í 3. sæti. Samkvæmt tölfræðiveitunni Gracenote eru aðeins 1,74% líkur á að Finnar komist í 16-liða úrslit. Finnar enduðu með 3 stig í B-riðli og markatöluna -2.

Úkraína endaði líka með 3 stig, í C-riðli, en markatöluna -1. Úkraína er því alltaf fyrir ofan Finnland í röðinni en þarf að treysta á hagstæð úrslit í annað hvort E- eða F-riðli í dag. Finnar þurfa að treysta á að hlutirnir falli með þeim í báðum riðlum í dag.

Hvernig vilja Finnar og Úkraínumenn að leikirnir fari í E- og F-riðli í dag?

E-riðill:

Svíþjóð er með fjögur stig, Slóvakía þrjú, Spánn tvö og Pólland eitt.

Ef Póllandi tekst ekki að vinna Svíþjóð og Spánn tapar fyrir Slóvakíu þá endar liðið í 3. sæti E-riðils með tvö stig. Það myndi skila Úkraínu í 16-liða úrslit og gagnast Finnum einnig.

Ef Spánn og Slóvakía gera jafntefli mun liðið í 3. sæti E-riðils enda með betri árangur en Úkraína og Finnland.

Ef Spánn vinnur Slóvakíu, og Pólland vinnur ekki Svíþjóð, endar Slóvakía í 3. sæti með 3 stig og markatölu í mínus (jafnmiklum mínus og sem nemur tapinu gegn Spáni). Þetta myndi skila Úkraínu í 16-liða úrslit. Finnar þurfa í þessu tilviki hins vegar þriggja marka sigur Spánar til að hafa af honum gagn.

F-riðill:

Liðið í 3. sæti F-riðils mun að lágmarki enda með þrjú stig. Fyrir leiki kvöldsins er Frakkland með fjögur stig, Þýskaland og Portúgal þrjú, og Ungverjaland eitt.

Ef að Portúgal nær í stig gegn Frakklandi er ljóst að liðið í 3. sæti F-riðils endar með fjögur stig, og úrslitin myndu þar með ekki gagnast Úkraínu eða Finnlandi.

Úkraína og Finnland þurfa því að treysta á sigur Frakka – Úkraína á þriggja marka sigur og Finnland á fjögurra marka sigur.

Belgía og Holland fá að vita hvaða liðum þau mæta

Belgía og Holland fá að vita í kvöld hvaða liðum þau mæta í 16-liða úrslitum en það verða liðin í 3. sæti E- og F-riðils. Sigurliðið í F-riðli mætir svo Sviss, nema að Finnland komist áfram, en sigurliðið í E-riðli mætir Úkraínu, Tékklandi eða Finnlandi.

Riðlakeppni EM lýkur í dag. Leikur Svíþjóðar og Póllands er í beinni útsendingu á Stöð 2 EM kl. 16 og á sama tíma mætast Slóvakía og Spánn á Stöð 2 Sport 2. Í kvöld eru svo leikir Portúgals og Frakklands, og Ungverjalands og Þýskalands.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 verður einnig hægt að kaupa stakt á kr. 6.990 en fyrir viðskiptavini með aðra áskrift en ofangreindar frá Stöð 2 kostar áskriftin kr. 3.990.

EM 2020 í fótbolta

Tengdar fréttir

Stórþjóð gæti setið eftir með sárt ennið í kvöld

Enn getur allt gerst í dauðariðlinum á EM en þar ráðast úrslitin í kvöld með leikjum Portúgals og Frakklands, og Þýskalands og Ungverjalands. Það eru síðustu leikirnir í riðlakeppni EM áður en útsláttarkeppnin tekur við.

Mest lesið


Fleiri fréttir

Sjá meira


×

Mest lesið