Adomas Drungilas valinn verðmætasti leikmaðurinn

Drungilas skoraði 24 stig, tók 11 fráköst ásamt því að eiga eina blokk gegn Keflvíkingum í kvöld.

Hann hafði nokkuð hægt um sig í fyrri hálfleik, en undir lok þriðja leikhluta og út leikinn tók hann yfir. Þá lét hann þristunum rigna og endaði með 75% nýtingu fyrir utan þriggja stiga línuna.

Drungilas byrjaði úrslitakeppnina í þriggja leikja banni og kom því ekki inn fyrr en í fjórða leik gegn Þór frá Akureyri. Það má því með sanni segja að Adomas Drungilas hafi komið hungraður inn í úrslitakeppnina eftir bannið.