Bandaríkin og SÞ verða ekki við beiðni Haítí um hermenn

Samkvæmt beiðninni áttu hermennirnir að hjálpa við að tryggja öryggi og vernda helstu stofnanir Haítí.

„Hvað eigum við að gera? Eigum við að láta ríkið ­falla í óreiðu?“ hefur AP fréttaveitan eftir Marhias Pierre, kosningaráðherra Haítí um beiðnirnar. „Við erum ekki að biðja um að landið verði hernumið. Við erum að biðja aðstoð og hjálp. Svo lengi sem við erum veikbyggða, held ég að við þurfum á nágrönnum okkar að halda.“

„Við þurfum augljóslega aðstoð og við höfum beðið alþjóðlega félagar okkar um hjálp,“ sagði Claude Joseph, starfandi forsætisráðherra, við AP. Hann sagði að hermenn gætu aðstoðað lögreglu Haítí við að tryggja öryggi í ríkinu.

Ekkert formlegt svar hefur borist frá Bandaríkjunum enn en fjölmiðlar vestanhafs hafa eftir heimildarmönnum sínum innan ríkisstjórnar Joes Biden að það standi ekki til. Þá stendur til að senda rannsakendur Alríkislögreglu Bandaríkjanna (FBI) til Haítí til að aðstoða við rannsókn á morðinu.

Þá segir í frétt New York Times að í Bandaríkjunum sé verið að rannsaka hvort öryggissveitir Haítí séu viðloðnar dauða Moise.

Mikil óvissa ríkir varðandi hver eigi í raun að fara með völd á Haítí. Forsetinn hafði rekið fjölmarga þingmenn og Hæstaréttardómara á kjörtímabili sínu og forseti Hæstaréttar, sem hefði samkvæmt stjórnarskrá átt að taka við forsetaembættinu, dó nýverið vegna Covid-19.

Kosningar áttu að fara fram í fyrra en þeim var frestað og daginn áður en hann var myrtur hafði Moise skipað Ariel Henry, sem nýjan forsætisráðherra. Joseph, sem er í raun utanríkisráðherra, hafði verið starfandi forsætisráðherra í tvo og hálfan mánuð þegar Moise var myrtur.

Henry hefur sagt að hann sé réttmætur forsætisráðherra.

Þá lýsti hópur þingmanna því yfir í gær að þeir teldu Joseph Lambert, forseta öldungadeildarþings Haíti, sem Moise hafði lagt niður, vera réttmætan forseta og að Henry væri réttmætur forsætisráðherra.

Joseph fer þó með stjórnartaumana á Haítí.

Í samtali við AP segir Joseph að honum þyki miður að aðrir séu að reyna að nota morð Moise í pólitískum tilgangi.

„Ég hef engan áhuga á valdabaráttu,“ sagði Joseph, sem nýtur stuðnings lögreglu og hers Haítí. „Það er bara ein leið til að verða forseti á Haítí og það er með því að vinna kosningar.“

Ráðamenn á Haítí segja hóp 28 manna hafa ráðist á forsetahöllina aðfaranótt miðvikudags. Tveir þeirra eru bandarískir ríkisborgarar, upprunalega frá Haítí, og 26 þeirra eru sagðir vera frá Kólumbíu. Búið er að handtaka sautján menn frá Kólumbíu og Bandaríkjamennina tvo.

Einhverjir árásarmannanna hafa verið felldir en lögreglan segir átta ganga enn lausa.

Enn liggur ekki fyrir hver höfuðpaur eða höfuðpaurar árásarinnar er eða eru.