Strákarnir hans Arons mættu ofjörlum sínum og frábær endasprettur Spánverja

Barein lék vel í riðlakeppninni og komst í átta liða úrslit á sínum fyrstu Ólympíuleikum. Bareinska liðið mætti hins vegar ofjörlum sínum í nótt og tapaði með fjórtán marka mun fyrir Frakklandi, 42-28.

Bareinar héldu í við Frakka framan af en í stöðunni 11-10 skildu leiðir. Frakkland skoraði skoraði tíu af síðustu fjórtán mörkum fyrri hálfleiks og leiddi, 21-14, að honum loknum.

Í seinni hálfleik breikkaði bilið enn frekar og Frakkar náðu mest sextán marka forskoti. Á endanum munaði fjórtán mörkum á liðunum, 42-28.

Kentin Mahe skoraði níu mörk fyrir Frakkland en allir útileikmenn liðsins komust á blað í leiknum. Frakkar mæta sigurvegaranum í leik Egypta og Þjóðverja í undanúrslitunum. Husain Alsayyad skoraði fimm mörk fyrir Bareina sem geta gengið stoltir frá borði eftir sína fyrstu Ólympíuleika.

Öllu meiri spenna var í leik Svíþjóðar og Spánar. Eftir góða byrjun Spánverja náðu Svíar frumkvæðinu og voru tveimur mörkum yfir í hálfleik, 20-18.

Svíþjóð var áfram fetinu framar í seinni hálfleik og komst mest fjórum mörkum yfir, 29-25. Spánn svaraði með ótrúlegum 8-1 kafla og náði þriggja marka forskoti, 30-33. Evrópumeistararnir unnu svo eins marks sigur, 33-34, og mæta annað hvort Dönum eða Norðmönnum í undanúrslitunum.

Aleix Gómez skoraði átta mörk fyrir Spán og þeir Raúl Entrerrios og Alex Dujshebaev sitt hvor fimm mörkin. Hampus Wanne var markahæstur hjá Spáni með tíu mörk. Fredric Pettersson skoraði sex.