Ástralar fóru illa með Argentínumenn á leiðinni í undanúrslitin

Ástralar unnu þá 38 stiga sigur á Argentínu, 97-59, í átta liða úrslitunum og tryggðu sér leik á móti Bandaríkjunum í undanúrslitunum. Í hinum leiknum mætast Frakkar og Slóvenar.

Yfirburðir Ástrala voru miklir eftir fyrsta leikhlutann sem Argentína vann með fjórum stigum, 22-18, Ástralar unnu annan leikhlutann með tíu stigum (21-11) og voru tólf stigum yfir fyrir lokaleikhlutann þar sem síðan keyrðu yfir argentínska liðið.

Ástralska liðið vann lokaleikhlutann 37-11 og þar með leikinn með svo miklum mun.

Patty Mills, sem spilar með San Antonio Spurs, var með 18 stig og stighæstur Ástrala en þeir Matisse Thybulle og Jock Landale skoruðu báðir tólf stig. Utah Jazz maðurinn Joe Ingles var síðan með 11 stig og 7 stoðsendingar en það voru margir að skila hjá ástralska liðinu.

Nico Laprovíttola var stigahæstur hjá Argentínu með 16 stig en hetjurnar Facundo Campazzo (9 stig) og Luis Scola (7 stig) voru aðeins með sextán stig saman.

Þetta verður mjög erfitt verkefni fyrir bandaríska liðið en Ástralar hafa unnið alla fjóra leiki sína á leikunum. Bandaríska liðið er það eina í undanúrslitum sem hefur tapað leik á mótinu.

Frakkar tryggðu sér sæti í undanúrslitum með níu stiga sigri á Ítölum, 84-75. Þeir hafa unnið alla fjóra leiki sína eins og Ástralía og Slóvenía en eina tap Bandaríkjamanna kom einmitt á móti Frökkum.

Rudy Gobert skoraði 22 stig fyrir Frakka og Evan Fournier var með 21 stig. Nicolas Batum skoraði 15 stig og tók 14 fráköst en hann var hæsta framlagið í franska liðinu. Hjá Ítölunum skoraði Danilo Gallinari mest eða 21 stig.