Talibanar segjast hafa unnið aftur norðurhéruð

Bano, Deh Saleh og Pul e-Hesar í Baghlan-héraði féllu í hendur uppreisnarhersveita í síðustu viku en það voru fyrstu merkin um mögulega vopnaða andspyrnu gegn yfirráðum talibana frá því að þeir sölsuðu undir sig höfuðborgina Kabúl 15. ágúst.

Talibanar endurheimtu svæðin í dag og hafa tekið sér stöðu í kringum Panjshir-dal samkvæmt talsmanni samtakanna. Í dalnum halda til hersveitir sem eru hliðhollar Ahamd Massoud, syni fyrrum skæruliðaleiðtoga sem barðist gegn Sovétríkjunum á sínum tíma. Á meðal þeirra eru leifar stjórnarhersins og sérsveita, að sögn Reuters-fréttastofunnar.

Massoud hefur krafist viðræðna við talibana um einhvers konar samsteypustjórn en hefur heitið því að verjast ef þeir reyna að taka Panjshir-dal.

Ekki hefur komið til átaka í dalnum ennþá þrátt fyrir að talibanar segist hafa sent hundruð liðsmanna sinna þangað. Talsmaður talibana heldur því fram að ætlunin sé að leysa ágreininginn á friðsaman hátt.