Barbára skoraði í sigri Brøndby

Kathrine Kuhl kom gestunum í Nordsjælland í 1-0 forystu eftir hálftíma leik og þannig var staðan þegar að flautað var til hálfleiks.

Barbára Sól jafnaði metin fyrir Brøndby á sjöttu mínútu seinni hálfleiks og 14 mínútum síðar kom Nanna Christiansen liðinu yfir af vítapunktinum.

Ashley Riefner fékk að líta rauða spjaldið í liði Nordsjælland á 66. mínútu og Barbára Sól og liðsfélagar hennar léku því manni fleiri seinustu 25 mínúturnar.

Brøndby tókst þó ekki að nýta sér liðsmuninn frekar og niðurstaðan því 2-1 sigur. Liðið er nú í þriðja sæti eftir fimm umferðir með tíu stig. Nordsjælland situr í næst neðsta sæti með þrjú stig.