Ekkert at­huga­vert við talningu í Suð­vestur­kjör­dæmi

Kristín Edward, formaður landskjörstjórnar, segir að skýrslan frá Suðvesturkjördæmi sýni að framkvæmdin þar hafi verið til fyrirmyndar og ekkert kalli á nánari yfirferð. Einnig hafa borist skýrslur frá Reykjavíkurkjördæmunum tveimur. Hún segist ekki geta tjáð sig um innihald þeirra í kvöld og þær verði ræddar á fundi landskjörstjórnar á morgun.

„Skýrslan frá Suðvesturkjördæmi kom fyrr í kvöld og ég hafði því bara tök á að fara yfir hana,“ segir Kristín. Von er á úttektinni frá Norðausturkjördæmi síðar í kvöld.

Kalla eftir skýringum

Upphaflega var óskað var eftir því að yfirkjörstjórnir væru búnar að skila skýrslunum klukkan átta í kvöld en einhverjar tafir hafa orðið á vinnslu þeirra í sumum kjördæmum. Kristín á von á að skýrslurnar frá Norðvestur- og Suðurkjördæmi komi á morgun en endurtalning fer nú fram í því síðarnefnda. Þá var óskað eftir nánari skýrslu frá Norðvesturkjördæmi í ljósi aðstæðna.

Boðað verður til fundar landskjörstjórnar eftir hádegi á morgun þegar allar skýrslur hafa skilað sér í hús.

Sem hluti af skýrslubeiðninni óskaði landskjörstjórn eftir upplýsingum um framkvæmd flokkunar og talningu atkvæða, meðferð kjörgagna allt frá því að þau bárust yfirkjörstjórn og þar til talningu var lokið og hvernig boðun og upplýsingagjöf til umboðsmanna var háttað. 

Þá var kallað eftir afriti af öllum fundagerðum yfirkjörstjórna frá og með kjördegi. Óskað var eftir ítarlegri upplýsingum frá Norðvesturkjördæmi þar sem einnig var beðið um skýringar á því að niðurstöður hafi breyst í endurtalningu. 

Hafði mikil áhrif á jöfnunarsæti

Eftir endurtalningu atkvæða í Norðvesturkjördæmi kom í ljós að atkvæði Viðreisnar höfðu verið oftalin um 9 og atkvæði Miðflokksins um 5. Kom breytingin af stað mikilli hringekju við útdeilingu jöfnunarþingsæta í öllum kjördæmum nema Norðausturkjördæmi og fækkaði konum á nýju þingi.

Ingi Tryggvason, formaður yfirkjörstjórnar í kjördæminu, greindi frá því í samtali við fréttastofu í gærkvöldi að atkvæði hafi ekki verið innsigluð eftir að talningu lauk og fram að endurtalningu. Skýrt er kveðið á um það í kosningalögum að innsigla eigi alla notaða kjörseðla þegar kjörstjórn lýkur talningu.

Magnús Davíð Norðdahl oddviti Pírata í Norðvesturkjördæmi hefur ákveðið að kæra kosningarnar í Norðvesturkjördæmi til kjörbréfanefndar Alþingis og fara fram á svokallaða uppkosningu sem felur í sér að kosið yrði að nýju í Norðvesturkjördæmi.

Þá boðaði Karl Gauti Hjaltason, fráfarandi þingmaður Miðflokksins, í dag að hann ætlaði að kæra framkvæmd kosninganna til lögreglu. Karl Gauti var á leið aftur á þing sem jöfnunarþingmaður í Suðvesturkjördæmi en missti sætið eftir endurtalninguna.

Fréttin hefur verið uppfærð.