Rússneskur ritstjóri sem flúði land eftirlýstur

Meðal annars hafa Dobrokhotov og Insider komið að rannsóknum á banatilræðinu gegn fyrrverandi njósnaranum Sergei Skripal, sem rússneskir útsendarar leyniþjónustu hers Rússlands (GRU) hafa verið sakaðir um að framkvæma, og eitrun stjórnarandstæðingsins Alexei Navalní. Eitrað var fyrir báðum með taugaeitrinu Novichok.

Í einni rannsókn Insider varpaði miðillinn, auk annarra, ljósi á sérstaka sveit Leyniþjónustu Rússlands (FSB), sem hafði fylgt Navalní eftir um langt skeið og eitrað fyrir honum.

Sjá einnig: Útsendarar FSB sagðir hafa eitrað fyrir Navalní

Í dag gerðu lögregluþjónar húsleit á heimili Dobrokhotov og foreldrum hans. Eiginkona hans og faðir voru færð í yfirheyrslur, auk þess sem símar þeirra, tölvur og aðrar eigur voru teknar af þeim.

Fjölmiðlar undir miklum þrýstingi

Ráðamenn í Rússlandi hafa beitt sjálfstæða fjölmiðla, stjórnarandstæðinga og mannréttindasinna töluverðum þrýstingi á undanförnum mánuðum, eins og fram kemur í frétt Guardian.

Fjölmiðillinn Insider var skilgreindur sem óæskilegur aðili í sumar. Sú skilgreining felur í sér að forsvarsmenn fyrirtækisins þurfa að gera grein fyrir öllum fjárveitingum til þeirra og merkja sérstaklega allt sem miðillinn birtir.

Seinna í þeim júlí var gerð húsleit á heimili Dobrokhotov og hann færður í yfirheyrslu.

Sjá einnig: Enn fleiri sjálfstæðum fjölmiðlum lokað í Rússlandi

Þá var nýverið opnuð rannsókn gegn stjórnarandstæðingnum Alexei Navalní og hann sakaður um stofnun öfgasamtaka á grundvelli laga sem voru ekki til þegar hann stofnaði samtök, sem heita Sjóður gegn spillingu. Þau hafa á undanförnum árum varpað ljósi á meinta spillingu Vladímírs Pútín forseta og ríkisstjórnar hans.

Þau voru skilgreind sem öfgasamtök í júní. Fjölmargir bandamenn Navalnís hafa verið handteknir eða flúið land á eftir að samtökin voru skilgreind sem öfgasamtök.

Sjá einnig: Saka Navalní um að ætla sér ofbeldisfulla valdatöku

Í samtali við Meduza, sjálfstæðan fjölmiðil sem yfirvöld í Rússlandi hafa einnig skilgreint sem óæskilega aðila eða útsendarar erlendra aðila, segir Roman Dobrokhotov, að eftir að hann tók þátt í rannsóknum með CNN og Bellingcat hafi vinir hans sagt honum að koma sér úr landi. Það væri galið og jafngildi sjálfsmorðs að búa áfram í Moskvu.

Heitir meiri rannsóknarvinnu

„Ég hunsaði þessar viðvaranir. Það var ekki fyrr en útsendarar öryggisþjónustunnar brutu niður hurðina að íbúð minni og tóku af mér tölvurnar og símana að ég áttaði mig á því að ég fengi ekki að vinna vinnu mína frá þessu landi,“ sagði Dobrokhotov.

Hann sagði ríkisstjórn Rússlands hafa brotið lögin. Vegabréf hans hefði verið tekið af honum og nú væri verið að reyna að klína á hann glæp.

„Brottför mín og þessi rannsókn mun ekki hafa nein áhrif á störf Insider. Þvert á móti mun fréttastofan verða virkari en nokkru sinni áður,“ sagði Dobrokhotov. Hann sagði að til stæði að ráða fleiri blaðamenn og birta fleiri og umfangsmeiri rannsóknir en áður.