Metfjöldi smitaðra og látinna í Rússlandi

31.299 greindust smitaðir í gær og 986 dó. Heilt yfir hafa 7.892.980 smitast af Covid-19 í Rússlandi, svo vitað sé og hafa 220.315 dáið. Moscow Times segir þó að frá því faraldurinn hófst hafi um 660 þúsund manns dáið, til viðbótar við meðaltal dauðsfalla á sama tímabili undanfarin ár.

Í fyrradag greindust 28.717 smitaðir og 984 dóu.

Mikhail Murashko, heilbrigðisráðherra Rússlands, sagði á þriðjudaginn að um það bil 235 þúsund af 255 þúsund sjúkrarúmum landsins væru í notkun. Um sex þúsund manns væru í öndunarvél.

TASS-fréttaveitan, sem er í eigu ríkisins, segir flesta hafa greinst í St. Pétursborg og í Moskvu. Þá segir fréttaveitan að í Rússlandi séu nú 734.909 virk smit.

Mikhail Mishustin, forsætisráðherra Rússlands, kvartaði á mánudaginn yfir því hve fáir Rússar hefðu bólusett sig. Rússum hefði verið gert mjög auðvelt að bólusetja sig en fáir hefðu gert það. Um 29 prósent Rússa eru fullbólusettir.