Iceland lofar að senda Daníel heim heilan heilsu í þetta sinn

Daníel, sem er leikmaður Blackpool í ensku B-deildinni í fótbolta, var óvænt kallaður inn í íslenska landsliðshópinn í október eftir að Jón Guðni Fjóluson meiddist.

Daníel spilaði svo fyrstu tvo keppnisleiki sína fyrir A-landsliðið og stóð sig vel en hann kom inn á í 1-1 jafntefli við Armeníu og byrjaði svo leikinn í 4-0 sigrinum gegn Liechtenstein.

Í seinni leiknum varð hann að fara af velli eftir hálftíma vegna höfuðmeiðsla sem héldu honum svo frá æfingum og keppni með Blackpool um skamman tíma.

Daníel var þó nokkuð fljótur að jafna sig og er á ný í landsliðshópnum sem mætir Rúmeníu annað kvöld og Norður-Makedóníu á sunnudaginn.

„Sendum hann til baka í góðu lagi“

Blackpool greindi frá því á Twitter að Daníel væri floginn af stað til móts við íslenska landsliðið og spaugsamur stuðningsmaður, Tom, sendi þá skilaboð til Iceland-verslanakeðjunnar þess efnis að í þetta sinn yrði Daníel að koma heill heilsu heim aftur.

„Við sendum hann til baka í góðu lagi bara fyrir þig Tom,“ svaraði Ben, starfsmaður Iceland og tók þátt í gríninu fyrir fyrirtækið sem er með um 200.000 fylgjendur á Twitter.

Daníel, sem er 26 ára Grindvíkingur, kom til Blackpool frá Aalesund í Noregi fyrir rúmu ári síðan. Hann lék 12 deildarleiki á síðustu leiktíð þegar Blackpool vann sig upp úr C-deildinni en biður enn eftir sínu fyrsta tækifæri í næstefstu deild Englands.

Daníel á nú að baki 3 A-landsleiki eftir að hafa þreytt frumraun sína í 1-0 sigri gegn Kanada í vináttulandsleik í janúar 2020.