Hraðasti vöxtur verðbólgu í þrjá áratugi

Nánast allar neysluvörur hafa hækkað og eldsneytisverð hefur ekki verið hærra í landinu í sjö ár. Það eina sem staðið hefur í stað eru flugfargjöld og áfengi, að sögn BBC. Joe Biden, forseti Bandaríkjanna, segir það í algjörum forgangi að reyna að koma í veg fyrir aukinn vöxt verðbólgu í landinu.

Talið er að skortur á starfsfólki hafi einnig haft áhrif á verðbólguna. Þá hafa margir atvinnuveitendur einnig þurft að hækka laun starfsmanna, sem leitt hefur til hærra vöruverðs. Aukin eftirspurn viðskiptavina, í kjölfar afléttinga á takmörkunum vegna kórónufaraldursins, hefur einnig haft áhrif.

Aukin verðbólga hefur valdið áhyggjum margra en Gylfi Zoega hagfræðiprófessor sagði fyrr á þessu ári að þróun efnahagsmála í Bandaríkjunum muni koma til með að hafa gríðarleg áhrif á alþjóðahagkerfið.