Rúmenska barnið á núna metið sem Siggi Jóns átti lengi

Sali kom inn á þegar átta mínútur voru eftir af leiknum. Hann fæddist 23. febrúar 2006 og var því fimmtán ára og 264 daga gamall í sínum fyrsta landsleik.

Sali sló þar með met Martins Ødegaard sem var fimmtán ára og þrjú hundruð daga gamall þegar hann lék sinn fyrsta keppnisleik með norska landsliðinu gegn Búlgaríu haustið 2014.

Ødegaard bætti þar met Sigurðar Jónssonar yfir yngsta landsliðsmann Evrópu í undankeppni stórmóts. Sigurður var 16 ára og 251 dags þegar hann lék gegn Möltu árið 1983. Hann átti því metið í 21 ár.

Eins og fjallað var um á Vísi í síðustu viku vonast Rúmenar til að tryggja sér Sali ef svo má segja. Hann á einnig kost á að spila fyrir landslið Kanada og Tyrklands. Ef hann ætlar sér að spila fyrir annað landslið en Rúmeníu þarf hann að bíða í þrjú ár eftir næsta landsleik sínum. Ef Sali spilar svo fjóra mótsleiki fyrir Rúmeníu má hann, samkvæmt reglum FIFA, ekki spila fyrir annað landslið.

Sali spilar fyrir Farul Constanta. Eigandi og þjálfari liðsins er Gheorghe Hagi, besti fótboltamaður sem Rúmenía hefur átt. 

Sali varð yngsti leikmaðurinn til að skora í rúmensku úrvalsdeildinni í september síðastliðnum. Hann gerði þá eitt mark í 5-0 sigri Farul á Academica Clinceni. Hann fagnaði markinu með því að stökkva í fangið á Hagi.