Eiginkona Abidals grunuð um að hafa látið berja Hamraoui í hefndarskyni

Í síðustu viku drógu tveir grímuklæddir menn Hamraoui út úr bíl fyrir utan heimili hennar í París og börðu hana í fæturna með járnrörum.

Samherji Hamraouis, Aminata Diallo, sem keyrði bílinn, var í kjölfarið handtekin, grunuð um að hafa skipulagt árásina. Henni var síðan sleppt úr varðhaldi eftir yfirheyrslu. Grunurinn beindist því næst að fyrrverandi kærasta Hamraouis en í aðdraganda árásarinnar fengu samherjar hennar hringingar frá honum þar sem hann sagði hana hafa eyðilagt líf sitt.

Franskir fjölmiðlar greina nú frá því að eiginkona Abidals, Hayet, sé grunuð um að hafa skipulagt árásina á Hamraoui til að hefna sín á henni vegna meints ástarsambands þeirra Abidals. Hann var íþróttastjóri Barcelona þegar Hamraoui gekk í raðir félagsins 2018 og þá þótti dularfullt að SIM-kortið í síma hennar var skráð á hann.

Abidal og Hayet hafa verið gift í átján ár og eiga fimm börn saman. Hann lék með Barcelona á árunum 2007-13 og var svo íþróttastjóri félagsins um tveggja ára skeið. Abidal var rekinn frá Barcelona eftir að karlalið félagsins steinlá fyrir Bayern München, 8-2, í átta liða úrslitum Meistaradeildar Evrópu í fyrra.

Eftir þrjú ár hjá Barcelona fór Hamraoui aftur til PSG í sumar. Hún lék ekki með liðinu þegar það tapaði 6-1 fyrir Lyon um helgina. Sömu sögu er að segja af Diallo.