Stúlknaliðið fékk silfur eftir mikla baráttu við Svía

Íslensku stelpurnar voru eins nálægt því að vinna gull og hægt verður en þær voru aðeins 0.100 á eftir sigurvegurum Svía. Minni verður munurinn ekki.

Ísland fékk 54.200 í heildareinkunn en Svíþjóð 54.300. Bretland fékk bronsið með 51.725 í heildareinkunn.

Mikill og góður andi var í íslenska liðinu sem fagnaði vel og innilega eftir vel heppnaðar æfingar á dýnu og trampólíni.

Íslensku stelpurnar byrjuðu á dýnu og fyrir stökkin sín þar fengu þær 16.850 í einkunn. Það var mikil bæting frá undanúrslitunum þar sem æfingar á dýnu skiluðu íslenska liðinu 14.400 í einkunn. 

Næst var komið að trampólinu og fyrir æfingarnar þar fékk Ísland 16.450 í einkunn og hækkaði sig einnig verulega frá undanúrslitunum (14.800). Eftir fyrstu tvær umferðirnar voru Íslendingar í 3. sæti.

Íslendingar luku leik á dansgólfinu þar sem þeir glönsuðu. Frábærlega útfærðar æfingar skiluðu 20.900 í einkunn. Það var hæsta einkunn sem nokkurt lið fékk fyrir æfingar sínar í dag. 

Hún skilaði íslenska liðinu upp í 2. sætið og svo grátlega nálægt gullinu. En íslensku stelpurnar fara heim með silfurmedalíu um hálsinn.