Bjargaði líki úr bíl við brún Níagarafossa

AP fréttaveitan segir ekki ljóst hvernig bíll konunnar, sem var á sjötugsaldri, endaði í ánni fyrir ofan fossana en mikil hálka var á svæðinu. Níagarafossarnir eru vinsælir ferðamannastaður og var margmenni á svæðinu en myndir og myndbönd af björgunartilraunum voru í dreifingu á samfélagsmiðlum.

Ekki var í boði að synda í átt að bílnum vegna staðsetningar hans og straums fyrir ofan fossinn. Björgunaraðilar notuðu dróna til að kanna hvort einhver væri í bílnum og þegar svo reyndist var þyrla Strandgæslu Bandaríkjanna kölluð til.

Derrian Duryea seig niður að bílnum á meðan flugmaðurinn Chris Monacelli og vélstjórinn Jon Finnerty fylgdust með ísingu sem myndaðist fljótt á þyrlunni yfir fossinum.

Í samtali við AP segir Duryea að hann hafi óttast að þurfa að brjóta rúðu í farþegahurð bílsins en hún hafi reynst ólæst. Honum tókst að opna hurðina, þrátt fyrir sterkan straum og komast í bílinn. Tveimur mínútum síðar gaf hann merki um að það þyrfti að hífa hann upp aftur.

Eins og áður segir, þá var konan látin. Hún bjó á svæðinu.