Segir að öllum sé slétt sama um velferð leikmanna

Mikið álag er á Liverpool um hátíðarnar en liðið leikur fimm leiki á tveimur vikum, þrátt fyrir að meiðsli og kórónuveiran hafi gert því skráveifu. Liverpool mætir Leicester City í átta liða úrslitum enska deildabikarsins í kvöld.

„Ég held að fólk geri sér ekki grein fyrir því hversu mikil ákefðin er,“ sagði Henderson við BBC.

„Fyrir okkur er fótboltinn allt og við viljum geta lagt okkur alla fram í hvert einasta sinn sem við stígum inn á völlinn. En því miður er það erfitt að á þessum tíma. Þetta hefur verið svona í nokkur ár og verið erfitt en núna bætist Covid ofan á og gerir þetta enn erfiðara og verra.“

Þrátt fyrir að smitum innan herbúða liðanna í ensku úrvalsdeildinni hafi fjölgað mjög var ákveðið að halda keppni áfram um hátíðirnar. Sex af leikjunum tíu sem áttu að fara fram í ensku úrvalsdeildinni um síðustu helgi var frestað.

„Ákvarðanir eru teknar og auðvitað viljum við sem leikmenn spila. En ég hef áhyggjur af velferð leikmanna og finnst að enginn taki hana nógu alvarlega sérstaklega í þessu árferði, með Covid,“ sagði Henderson.

„Við reynum að ræða okkar á milli og hafa einhver áhrif í framtíðinni en eins og staðan er núna finnst mér eins og það sé ekki borin virðing fyrir leikmönnum að því leyti þeir hafi ekki talsmann og hafi vald til að mótmæla og segja að þetta sé ekki í lagi út frá heilsu þeirra.“

Henderson missti af jafntefli Liverpool og Tottenham, 2-2, í ensku úrvalsdeildinni á sunnudaginn vegna flensu. Nokkrir aðrir leikmenn voru frá vegna kórónuveirusmita og meiðsla.

Leikur Liverpool og Leicester hefst klukkan 19:45 í kvöld og verður sýndur beint á Stöð 2 Sport 2.