Liver­pool stað­festir komu Díaz

Enska knattspyrnufélagið Liverpool hefur staðfest komu vængmannsins Luis Díaz. Hann er Kólumbíumaður sem kemur frá Porto í Portúgal.

Hinn 25 ára gamli Díaz virtist við það að ganga í raðir Tottenham Hotspur en eftir að Liverpool kom inn í myndina var ljóst að vængmaðurinn væri á leiðinni í Bítlaborgina.

Talið er að Díaz kosti Liverpool í kringum 45 milljónir punda. Hann mun veita Sadio Mané, Diogo Jota og Mohamed Salah samkeppni.

Díaz skoraði 41 mark í 125 leikjum fyrir Porto og mun klæðast treyju númer 23 hjá Liverpool. Tekur hann við treyju Xerdans Shaqiri en sá var einnig varaskeifa fyrir Mané, Salah og Jota.