Umhverfisráðherra segir Íslendinga engan tíma mega missa

Andrés Ingi Jónsson þingmaður Pírata hóf sérstaka umræðu um loftslagsmál á Alþingi i dag og sagði Íslendinga langt á eftir áætlun í lofstslagsmálum. Ekkert ríki hefði hins vegar gert nóg í þessum málum. Samþykkt hafi verið á loftslagsráðstefnunni í Glasgow í fyrra að ríkin kæmu strax á þessu ári með uppfærða landsáætlun níu mánuðum fyrir næsta fund.

„Næsti fundur verður í Sharm El-Sheikh (í Egyptalandi) 7. nóvember. Þannig að níu mánaða fresturinn sem Sameinuðu þjóðirnar setja rennur út á mánudaginn kemur,“ sagði Andrés Ingi.

Guðlaugur Þór Þórðarson umhverfis-, orku-, og loftslagsráðherra sagði stjórnvöld nú vinna að uppfærslu áætlana í samvinnu við sveitarfélög og fleiri aðila. Mestu máli skipi hins vegar hvað gert væri til að ná markmiðum orkuskipta. Blikur væru á loft í orkumálum.

Ráðherra minnti á að raforkuframleiðendur gætu um þessar mundir ekki svarðað þörfum kaupenda skerðanlegrar orku vegna slæms ársferðis í vatnsbúskap virkjana. Þannig þyrftu fiskimjölsverksmiðjur að brenna 20 til 30 þúsund tonnum af olíu til að framleiða raforku.

„Bent hefur verið á að þetta jafngildi því að sá árangur sem náðst hefur í að draga úr losun frá bifreiðum með rafbílavæðingu Íslendinga frá árinu 2010 til dagsins í dag hverfi vegna þessara aðstæðna,“ sagði Guðlaugur Þór.

Sama staða blasti síðan við fjarvarmaveitum um þessi mánaðamót. Þetta muni til dæmis margfalda útflástur Orkubús Vestfjarða. Íslendingar megi engan tíma missa til að ná markmiðum stjórnvalda í loftslagsmálum um stórfellda minnkun á útblæstri gróðurhúslofttegunda.

„Ef orkuskiptin eiga að skila tilætluðum árangri verður að vera til staðar græn orka. Það er staðreynd sem ekki verður horft fram hjá. Við megum engan tíma missa. Í þessu samhengi er rétt að taka fram að ég hyggst á næstu vikum leggja fram tvö frumvörp sem hafa það að markmiði annars vegar að bæta nýtingu virkjana og hins vegar leiða af sér orkusparnað," sagði Guðlaugur Þór Þórðarson.

Ríkisendurskoðanda skákað til án heimilda

Það var rætt um margt fleira á Alþingi í dag. Jóhann Páll Jóhannsson þingmaður Samfylkingarinnar mótmælti því til dæmis að Skúli Eggert Þórðarson ríkisendurskoðandi hafi verið færður án auglýsingar í embætti ráðuneytisstjóra í menningar- og viðskiptaráðuneytinu.

Heimild ráðherra til að færa embættismenn á milli ráðuneyta næðu ekki til ríkisendurskoðanda sem heyrði undir Alþingi. Það þyrfti meira en samþykki forseta Alþingis fyrir þessum búferlaflutningum.

„Ég ætla að leyfa mér að halda því fram að með þessum gjörningi sé verið að misbeita 36. gr. starfsmannalaga. Það mundi engum detta það í hug að ráðherra gæti t.d. teygt sig yfir á svið dómsvaldsins og sótt sér þangað dómara og fært yfir í ráðuneyti sitt,“ sagði Jóhann Páll.

Hér hefði verið sett hættulegt fordæmi.

„Ég mótmæli þessu. Þetta stríðir gegn þrískiptingu ríkisvalds. Þetta er virðingarleysi gagnvart Alþingi og gagnvart þeim eftirlitsstofnunum sem starfa á vegum Alþingis. Við hér í þessum sal getum ekki setið þegjandi undir þessu og við gerum það ekki. Það verður að taka þetta til skoðunar,“ sagði Jóhann Páll Jóhannsson.