Gary Trent yngri skilar stórstjörnutölum í hverjum leik í NBA-deildinni

Gary Trent Jr. skoraði 33 stig og Pascal Siakam var með 16 stig og 14 fráköst þegar Toronto vann 110-106 sigur á Miami Heat. Þetta var fimmti þrjátíu stiga leikur Trent í röð en með því jafnaði hann félagsmet Toronto Raptors.

Toronto liðið hefur nú unnið þrjá leiki í röð en þetta var líka annar sigur liðsins á Miami á stuttum tíma eftir sigur á Heat í þríframlengdum leik um helgina. Fred VanVleet skoraði 21 stig fyrir Toronto en Bam Adebayo var með 32 stig og 11 fráköst hjá Miami og Jimmy Butler bætti við 16 stigum og 12 stoðsendingum í þessu þriðja tapi Heat liðsins í röð.

„Hann er fullur sjálfstrausts og það er mjög erfitt að verjast honum þessa dagana,“ sagði Nick Nurse, þjálfari Toronto um skotbakvörðinn. Trent hitti úr 6 af 10 þriggja stiga skotum sínum í leiknum.

Trent yngri er aðeins 23 ára gamall og kom til Toronto Raptors á sínum tíma í leikmannaskiptum við Portland Trail Blazers. Hann fann sig strax vel hjá Toronto en hefur tekið næsta skref í vetur.

„Ég held að við séum fyrst að sjá hver hann er á þessu tímabili. Við sjáum meira af persónuleika hans. Hann talar meira, er að stíga fram sem leiðtogi og kemur með þetta keppnisskap sitt á báðum endum vallarins,“ sagði Fred VanVleet um Trent.

Devin Booker og Chris Paul voru báðir frábærir þegar Phoenix Suns vann 121-111 sigur á Brooklyn Nets en besta lið deildarinnar vann þarna sinn ellefta sigurleik í röð. Booker skoraði 35 stig og Paul bætti við 20 stigum og 14 stoðsendingum. Mikal Bridges var síðan með 27 stig.

Kyrie Irving og James Harden voru í aðalhlutverki hjá Brooklyn liðinu en komu ekki í veg fyrir fimmta tapleikinn í röð. Harden hafði missti af síðustu tveimur leikjum en var með 22 stig og 10 stoðsendingar. Irving, sem gat spilað af því að Nets var á útivelli, skoraði 26 stig . Kevin Durant er enn frá vegna meiðsla og það gengur mjög illa hjá Nets að spila þeim öllum þremur saman.

Giannis Antetokounmpo var með þrefalda tvennu þegar Milwaukee Bucks vann 112-98 sigur á Washington Wizards en hann var með 33 stig, 15 fráköst og 11 stoðsendingar en meistararnir rifu sig upp eftir stóran skell á móti Denver í leiknum á undan.

Golden State Warriors þurfti ekki stjörnurnar þegar liðið vann 124-120 útisigur á San Antonio Spurs. Þetta var sjöundi sigurleikur liðsins í röð og það þrátt fyrir að stjörnuleikmennirnir Stephen Curry, Klay Thompson, Draymond Green og Andrew Wiggins hafi allir verið fjarverandi.

Jordan Poole skoraði 31 stig þar á meðal þriggja stiga körfuna undir lokin sem Golden State yfir þegar 17,9 sekúndur voru eftir. Damion Lee skoraði 21 stig og Moses Moody var með 20 stig en Dejounte Murray var í aðalhlutverki hjá Spurs með 27 stig, 9 fráköst og 9 stoðsendingar.