„Deildin er ekki að fara í gjaldþrot og það eru engir leikmenn með frjálsa för“

Selfoss hefur ungað út landsliðsmönnum á undanförnum árum eins og Íslendingar hafa orðið vel varir við á stórmótum, nú síðast Evrópumótinu í Ungverjalandi og Slóvakíu, og fyrir þremur árum varð liðið Íslandsmeistari í fyrsta sinn.

Í hlaðvarpsþættinum Handboltinn okkar var því haldið fram að nú væri hins vegar heldur dekkra yfir á bökkum Ölfusár, og að Selfyssingar skulduðu um og yfir 30 milljónir króna og hefðu tilkynnt ákveðnum leikmönnum að þeim væri frjálst að yfirgefa félagið í sumar:

„Þetta er bara kjaftæði,“ segir Þórir Haraldsson, formaður handknattleiksdeildar Selfoss, í samtali við Vísi og vill ekki meina að félagið muni að verulegu leyti draga saman seglin:

„Deildin er ekki að fara í gjaldþrot og það eru engir leikmenn með „frjálsa för“. Við ætlum að halda áfram okkar öfluga starfi en við þurfum að gefa í til að geta klárað þetta verkefni. Auðvitað mun þetta hafa áhrif á reksturinn en við munum ekki segja upp leikmannasamningum með neinum hætti,“ segir Þórir.

Það sé því kolrangt að ætla að það stefni í „brunaútsölu“ hjá Selfyssingum á leikmannamarkaðnum í vor: „Algjörlega. Það er ekki í myndinni.“

Þó að Þórir segi rangt að Selfoss skuldi 30 milljónir króna viðurkennir hann að fjárhagsstaðan hafi versnað mikið í kórónuveirufaraldrinum, þó að Árborg hafi hlaupið undir bagga og bætt upp tekjutap vegna miðasölu frá síðustu áramótum.

Tugmilljóna tap vegna Covid

„Fjárhagsstaða handknattleiksdeildarinnar á Selfossi er slæm, eins og margra annarra félaga, eftir að hafa orðið fyrir tugmilljóna tapi vegna Covid sem ekki hefur verið bætt. Það er verkefni sem við höfum verið og erum að vinna að.

Við erum að leita stuðnings hjá styrktaraðilum og sveitarfélagi, og ef að ekkert kemur til þá er þetta eitthvað sem að við þurfum að fást við yfir nokkur ár. Við munum auðvitað bara klára það verkefni en okkur finnst mjög ósanngjarnt að deild sem að hefur verið í mjög góðum rekstri sitji allt í einu uppi með skuldahala af því að allar foresendur bresta þegar öllu er skellt í lás og það koma takmarkaðar bætur á móti,“ segir Þórir sem segir úrræði ríkisins hingað til engan veginn hafa dugað.

Gríðarlega erfitt verkefni fyrir sjálfboðaliða

„Tjónið liggur náttúrulega í því að áhorfendatekjur hafa í tvö ár, frá upphafi Covid, verið nánast engar. Verulegur hluti af okkar tekjum kemur af leikjum á vorin, auk stórra móta og annarra tekjuaflana sem við stöndum fyrir. Bylgjur faraldursins komu því mjög illa við helstu tekjuöflunartímabil okkar,“ segir Þórir og bætir við:

„Tjónið nam vissulega tugmilljónum hjá okkur, ég vil ekki gefa upp ákveðnar tölur í því samhengi, en þetta eru verulegar fjárhæðir sem við þurfum að ná til baka.

Við erum búin að gera áætlanir um að ef við þurfum að bera allt tjónið sjálf þá munum við ná því niður á 4-5 árum, og við höfum þegar náð miklum árangri í að ná niður þessu tjóni, en það verður auðvitað gríðarlega erfitt verkefni fyrir sjálfboðaliða á næstu árum að halda uppi öflugri og fullri starfsemi samhliða því að bæta upp Covid-tapið.“