Í næstu viku er allra síðasti möguleiki á að kaupa DOTTIR miða á EM 2022

Það hefur verið mikill áhugi á miðum á leiki íslensku stelpnanna og í fyrri tveimur söluglugganum hafa miðarnir selst upp.

Knattspyrnusamband Íslands hefur nú látið vita að það eru nokkrir miðar að losna og verður örugglega mikill áhugi á þeim eins og hinum.

Vandamálið er að fyrstu tveir leikir íslenska liðsins fara í raun fram á alltof litlum leikvangi og því er barist um miðana.  Þetta er Manchester City Academy leikvangurinn í Manchester sem tekur bara sjö þúsund manns.

Miðasala í stuðningsmannahólf þátttökuliðanna á EM 2022 hófst síðastliðið haust í glugga sem stóð frá lokum október og inn í miðjan nóvember.

Þar fengu stuðningsmenn Íslands tækifæri til að kaupa svokallaða DOTTIR miða - í stuðningsmannahólf íslenska liðsins. DOTTIR miðar á fyrstu tvo leikina - gegn Belgíu og Ítalíu í Manchester - seldust fljótt upp. Í nóvember var síðan hundrað DOTTIR miðum á leikina bætt í sölu, og aftur seldust þeir hratt upp.

Nú hefur UEFA upplýst KSÍ um að fleiri DOTTIR miðar verði lausir í sölu til stuðningsmanna Íslands, miðar sem losna af ýmsum ástæðum í lokaundirbúningi og skipulagi mótsins. Um er að ræða 200-300 DOTTIR miða á alla leikina þrjá í riðlakeppninni, og getur hver kaupandi keypt allt að tíu miðum á hvern leik.

Sala á þessum DOTTIR miðum opnar á miðasöluvef UEFA miðvikudaginn 16. mars klukkan 10:00 og lokar föstudaginn 18. mars klukkan 10:00.

Lokagluggi almennrar miðasölu opnar síðan á miðasöluvef UEFA 28. mars og rétt er að geta þess að enn eru almennir miðar lausir á síðasta leik íslenska liðsins í riðlinum, gegn Frakklandi í Rotherham.