Þúsundir Úkraínumanna snúa til baka í stríðið

Rússar héldu uppi miklum eldflauga og sprengjuárásum á Kænugarð í nótt og hæfðu meðal annars fimmtán hæða fjölbýlishús sem er mikið skemmt eða ónýtt eftir árásina. Að minnsta kosti einn maður lést og fjöldi fólks grófst undir húsarústum. Óskar Hallgrímsson og kona hans vöknuðu við lætin í nótt.

„Síðan klukkan fimm, vöknum við bæði við þvílíkar sprengingar og læti. Þetta var eins og þetta væri bara í garðinum hjá okkur. Húsið nötraði allt og skalf og hélt áfram," segir Óskar.

Þetta hafi verið mestu loftárásir Rússa á Kænugarð frá því á fyrstu dögum stríðsins. Mest heyrist þó í loftvörnum Úkraínuhers sem gengið hafi mjög vel að granda flugskeytum Rússa.

Slökkviliðsmönnum tókst að bjarga fjölda manns úr brennandi fjölbýlishúsinu í nótt. Hinn tuttugu og fjögurra ára gamli slökkviliðsmaður Andryi barðist við tárin á vettvangi.

„Við tökum á honum stóra okkar og höldum áfram að vera sterk og allt fer vel. Við munum verja Úkraínu, verja líf fólksins okkar. Það skiptir öllu máli,“ sagði slökkviliðsmaðurin ungi.

Alex Goncharenko þingmaður á úkraínska þinginu var einnig sigurviss þar sem hann var mættur til að virða fyrir sér afleiðingar árásarinnar í morgun.

„Putin getur ekki unnið herinn okkar. Herinn okkar heldur vel í við hann þannig að nú ræðst hann á óvopnað fólk, ófrískar konur eins og í Mariupol, börn og fólk á flótta. Þannig að þetta er þjóðarmorð á 21. öldinni í miðri Evrópu,“ segir þingmaðurinn.

Mannfallið og eyðileggingin í Mariupol hefur verið gífurleg. Íbúðarhús, skólar og sjúkrahús eru í rústum og illa gengur að koma vistum til íbúanna. Rússar hafa setið um borgina í um hálfan mánuð og haldið uppi stöðugum loftárásum, þannig að fólk sem vogar sér upp úr kjöllurum þarf stöðugt að hlaupa í skjól undan flugskeytum og stórskotaliðsárásum.

Ung kona sem hljóp í skjól í stigagangi með föður sínum og hópi fólks féll algerlega buguð í fang eldri föður síns.

„Pabbi ég get þetta ekki lengur,“ sagði hún grátandi og beindi síðan orðum sínum til umheimsins: „Við fáum engar upplýsingar. Við vitum ekkert. Það er engu líkara en við búum djúpt inni í skógi. Þeir hefðu átt að upplýsa okkur, að minnsta kosti um hvað er að gerast hvar,“ sagði konan grátandi.

Friðaviðræður hafa ekki skilað neinu hingað til en Volodymyr Zelenskyy forseti Úkraínu þakkar þeim Rússum sem þora þrátt fyrir hættu áfangelsisvist að mótmæla stríðinu. Eins og starfskonu rússneska sjónvarpsins sem truflaði útsendingu í gær með slagorðum gegn stríðinu og póstaði yfirlýsingu á Netið.

„Hið hughrakka varnarlið okkar heldur áfram að valda rússneskum hersveitum miklu tjóni. Fjöldi þyrlna sem skotinn hefur verið niður nálgast hundraðið. Þeir hafa nú þegar misst um áttatíu þotur, hundruð skriðdreka og þusundir af alls kyns búnaði öðrum,“ segir Zelenskyy.