2.050 krónur fyrir fjöru­tíu mínútna verslunar­ferð í IKEA á nýjum deili­bíl

Hopp hefur hingað til einbeitt sér að rafskútum, sem hægt er að leigja í gegnum smáforrit. Skúturnar eru í boði um allt land - og meira að segja á Spáni og í Færeyjum að auki. Nýir deilibílar Hopps og Hölds - bílaleigu Akureyrar munu virka á sama máta og skúturnar; bílarnir, sem allir eru rafbílar, koma upp í appinu, notendur finna þá - skanna QR-kóða, sannreyna ökuskírteini sitt, samþykkja skilmála - og aka svo af stað. Sæunn Ósk Unnsteinssdóttir framkvæmdastjóri Hopps Reykjavík telur að bílarnir muni nýtast mörgum.

„Og líka bara þá sem vilja og eru kannski að kalla eftir bíl númer tvö, sem maður heyrir mjög mikið um. Fyrir utan náttúrulega bíllausan lífsstíl og að kjósa og velja að eiga ekki bíl en þá er gríðarlega mikilvægt að hafa aðgengi að bíl, hann er hvar sem er í borgarlandinu. Þú þarft bara að finna hann inni í appinu og getur notað hann að vild,“ segir Sæunn.

Þó að þjónustusvæðið miðist til að byrja með aðeins við Reykjavík er samt hægt að aka bílunum út fyrir borgarmörkin, setja ferðina á pásu og hoppa til dæmis inn í verslun, en svo þarf að aka bílunum aftur inn í Reykjavík til að leggja þeim. 

Sæunn segir þann eiginleika, þ.e. að hægt sé að leggja bílunum hvar sem er, jafnvel í gjaldskyld stæði, gera þjónustu Hopps frábrugðna til dæmis deilibílaleigunni Zipcar, sem komið var á fót 2018. Þá óttast hún ekki skort á eftirspurn.

„Við höfum alveg rosalega mikla trú og við sjáum að tíminn er núna. Hver hefði trúað því fyrir tveimur árum að rafskúturnar yrðu svona gríðarlega vinsælar em samgöngumáti?“ segir Sæunn.

Startgjald Hoppdeilibílanna í þessum fyrsta fasa er 300 krónur og mínútugjaldið 45 krónur. Að setja bílinn á pásu kostar 10 krónur á mínútuna. Þannig myndi til að mynda 15 mínútna ökuferð fram og til baka frá Borgartúni í IKEA, miðað við að fjörutíu mínútum sé varið inni í búðinni með bílinn á pásu, kosta 2.050 krónur.