Suður- og vesturhlutar landsins lentu í rifu á milli tveggja veðrakerfa í dag — það hlaut eitthvað að vera; í fyrsta sinn um nokkra hríð var veður á höfuðborgarsvæðinu ekki fjandsamlegt öllu mannlífi.
Bongóblíða, sögðu sumir viðmælendur fréttastofu í stuttri athugun í miðbæ Reykjavíkur í dag. Þar dró ýmislegt annað til tíðinda; þýskunemar lærðu úti í sólinni, Þjóðverjar skáluðu fyrir sólinni og mæður keyptu fyrstu sólgleraugun á nýfædd börn.
Það vorar — um það er ekki deilt. En bongóhugtakið er hins vegar faglegur mælikvarði. Á Twitter-síðunni „Er bongó?“ sem hefur úrskurðarvald um þetta efni hefur ekkert tíst birst um að í dag hafi verið bongóblíða. Kannski það þurfi minnst tveggja stafa tölu til þess — í dag voru gráðurnar mest sjö.
Á morgun þykknar aftur upp á Suður- og Vesturlandi en rofar á móti til norðan- og austanlands. Svo verður víðast hvar þungbúið dagana á eftir — skammgóðir vermir sem sagt þetta ástand í dag.
Síðasta tíst umrædds aðgangs:
Það er Bongó!
— .....Er Bongó? (@erbongo) August 12, 2021
