Nýsköpunarvikan: „Þar heilluðumst við af þessum heimi en fannst um leið vanta slíkan viðburð hér heima“

Vildu leggja sitt af mörkum

Edda Konráðsdóttir og Melkorka Sigríður Magnúsdóttir stýra Iceland Innovation Week. Fyrsta hátíðin var haldin árið 2020 og var þá alfarið á netinu vegna samkomutakmarkana.

„Það var vægast sagt sérstakt að standa með forseta og ráðherra í Grósku og setja hátíðina sama dag og hörðustu samkomutamkarkanir okkar tíma voru settar á,”

segja þær um upphaf verkefnisins. Árið eftir stækkaði hátíðin margfalt og var haldin bæði á netinu og í persónu. Þá fóru 114 viðburðir fram í samstarfi við um sjötíu samstarfsaðila og yfir þrjú þúsund manns sóttu hátíðina í net- og raunheimum.

Mikil reynsla í nýsköpunarumhverfinu

Edda og Melkorka hafa báðar verið virkar í nýsköpunarumhverfinu síðustu ár. Þær unnu báðar hjá fyrirtækinu Icelandic Startups sem heitir í dag Klak og stýrðu þar hröðlum og stuðningsverkefnum fyrir sprotafyrirtæki.

„Við Melkorka höfðum báðar verið að vinna í stuðningsumhverfi sprotasamfélagsins hér heima og meðal annars stýrt sendiferðum á erlendar sprota og tækniráðstefnur. Þar heilluðumst við af þessum heimi en fannst um leið vanta slíkan viðburð hér heima,“ 

segir Edda um hugmyndina á bakvið Iceland Innovation Week. Hún segir öll hin Norðurlöndin eiga sínar nýsköpunarhátíðir sem þúsundir sækji á hverju ári bæði fjárfestar, frumkvöðlar og aðrir innan úr sprotasamfélaginu.

Teymið

Ásamt þeim Eddu og Melkorku er Guðfinna Birta Valgeirsdóttir markaðsstjóri og Karitas Ósk Harðardóttir viðburðastjóri vikunnar. Atli Stefán og Kristján Thors hafa það að auki umsjón með FoodMood, viðburðum tengdum matarnýsköpun á hátíðinni og segja þær teymið mynda góða heild.

Hátíðin er að mörgu leyti drifin áfram af sjálfboðaliðum innan úr háskólasamfélaginu en Melkorka og Edda segja ómögulegt að standa að svo stórum viðburði ef ekki væri fyrir þá.

„Þær Karitas og Guðfinna byrjuðu fyrst með okkur sem sjálfboðaliðar á hátíðinni en eru í dag komnar inn í grunnteymi hátíðarinnar. Við vonumst til að bæta fleirum við okkur eftir því sem hátíðin vex.“

Vildu leggja sitt af mörkum

Eddu og Melkorku fannst sprotafyrirtæki vanta ákveðinn farveg til þess að vaxa út fyrir landsteinana og mótaðist Iceland Innovation Week meðal annars út frá þeirri vöntun.

„Okkar tilfinning er sú að það sé tiltölulega einfalt að stofna fyrirtæki hér á landi, en vandi flestra snýr að því að skala og vaxa út fyrir landsteinanna. Við vildum leggja okkar af mörkum og þess vegna stofnuðum við Iceland Innovation Week,“

segir Melkorka. Þær segja ómetanlegt að hafa fundið góðan stuðning frá stjórnvöldum allt frá fyrsta fundinum með Þórdísi Kolbrúnu þáverandi nýsköpunarráðherra. Þær segja stuðninginn hafa haldið sér eftir að Áslaug Arna tók við embættinu.

„Sá stuðningur í upphafi var alveg ómetanlegur og hefur haldist með nýjum ráðherra sem kemur eins og elding inn í nýsköpunar og sprotasamfélagið. Það er ótrúlega mikilvægt fyrir okkur að vera með stuðning bæði úr opinbera geiranum og einkageiranum,” segja þær.

Nordic Startup Awards

Í ár fékk Iceland Innovation Week tækifæri til þess að halda utan um Nordic Startup Awards sem hafa hingað til verið haldin í kaupmannahöfn en þau fara fram í Hörpu þann 18. maí. Þær segja það mikinn feng fyrir íslenska nýsköpunarsamfélagið að fá þessa hátíð til landsins og alla þá flottu gesti sem sækja hana.

„Við værum til í að sjá fleiri konur í nýsköpun og hvetjum því sérstaklega konur til þess að mæta á viðburðina og kynna sér hvað er að gerast í nýsköpunarheiminum,“

segja þær að lokum.