Brassar vongóðir um að landa Guardiola og myndu borga svimandi há laun

Þetta fullyrðir spænska blaðið Marca í dag.

Guardiola, sem er 51 árs, hefur verið knattspyrnustjóri Manchester City frá árinu 2016 og hefur áður stýrt Bayern München og Barcelona.

Núgildandi samningur Guardiola við City rennur út á næsta ári og ætla Brasilíumenn að nýta sér það til að fá þjálfarann sigursæla til starfa, hvort sem það yrði strax í janúar eða um sumarið 2023.

Samkvæmt Marca hafa forkólfar brasilíska knattspyrnusambandsins þegar sett sig í samband við umboðsmanninn Pere Guardiola, bróður Peps.

Samræðurnar munu hafa gengið ágætlega og hugmyndin er sú að Guardiola fái 12 milljónir evra í árslaun eftir skatt, jafnvirði 1,7 milljarðs króna, en Marca segir hann fá 20 milljónir evra hjá Manchester City.