Grunaður um ýmis brot og reyndi að hlaupa frá lögreglu

Skömmu fyrir klukkan eitt í nótt var maður handtekinn í miðbænum eftir umferðaróhapp en ökumaðurinn er grunaður um ýmis brot.

Má þar meðal annars nefna akstur undir áhrifum áfengis og fíkniefna, fyrir að fara ekki að fyrirmælum lögreglu, og að reyna að hlaupa á brott af vettvangi. Maðurinn var vistaður fyrir rannsókn málsins í fangageymslu lögreglu.

Á svipuðum tíma hafði lögregla afskipti af ökumanni bifhjóls í Árbæ en ökumaðurinn hafði ekið yfir gatnamót á rauðu ljósi. Maðurinn er einnig grunaður um akstur undir áhrifum fíkniefna og ítrekaðan akstur sviptur ökuréttindum.

Fleiri sviptir ökuréttindum

Laust eftir klukkan eitt var síðan ökumaður stöðvaður á Reykjanesbrautinni en sá er grunaður um akstur undir áhrifum fíkniefna og ítrekaðan akstur sviptur ökuréttindum. Fyrr um kvöldið hafði ökumaður verið stöðvaður í Grafarholti af sömu ástæðu.

Í dagbók lögreglu kemur einnig fram annar ökumaður hafi verið stöðvaður í Grafarholti á tíunda tímanum í gærkvöldi en mikil fíkniefnalykt kom frá ökumanni. Lögreglumenn fundu ætluð fíkniefni í bílnum en ökumaðurinn sjálfur reyndist ekki vera undir áhrifum. Efnin voru haldlögð og skýrsla rituð.

Þá var lögregla með eftirlit með ölvunarakstri á Hafnarfjarðarvegi þar sem alls voru um 65 stöðvaðir. Tveir reyndust undir refsimörkum og var gert að hætta akstri en einn var kærður fyrir ölvun við akstur, akstur án gildra ökuréttinda og skjalafals, þar sem hann var með falsað ökuskírteini.

Tveir í annarlegu ástandi handteknir

Lögregla hafði sömuleiðis afskipti af einstaklingum í annarlegu ástandi en einn var handtekinn í miðbænum klukkan hálf þrjú í nótt þar sem hann var að veitast að fólki og fór ekki að fyrirmælum lögreglu. Var hann vistaður sökum ástands í fangageymslu lögreglu.

Klukkan þrjú hafði lögregla afskipti af manni sem var að kasta af sér þvagi á hús Héraðsdóms Reykjavíkur. Maðurinn var kærður fyrir brot á lögreglusamþykkt fyrir Reykjavíkurborg.

Upp úr klukkan fjögur í nótt var lögregla þá kölluð út að veitingahúsi í Hafnarfirði vegna ofurölvi manns. Maðurinn var í tökum dyravarða og fór ekki að fyrirmælum lögreglu en hann var handtekinn og vistaður sökum ástands í fangageymslu lögreglu.