Vantrauststillaga mögulega til umræðu á félagsfundi Eflingar

Öllu starfsfólki Eflingar var sagt upp í síðustu viku, þar á meðal Agnieszku Ewu Ziólkowska, varaformanni Eflingar, en hún staðfestir í samtali við fréttastofu að félagsmenn hafi kallað eftir fundinum.

Vísar hún til þess að samkvæmt lögum Eflingar sé þeim skylt að halda félagsfund ef minnst 300 félagsmenn krefjast þess.„Þetta er vilji félagsmanna,“ segir Agnieszka en fundurinn fer fram næstkomandi föstudag. 

Aðspurð um hvort það standi til að leggja fram vantrauststillögu á fundinum, líkt og heimildir fréttastofu herma, segir hún það mögulegt en að það sé undir félagsmönnum komið. Hún segir viðfangsefni fundarins almennt opið. 

„Félagsmenn eiga skilið að fá útskýringar fyrir þessari hópuppsögn,“ segir Agnieszka en hún segist ekki bjartsýn á að Sólveig Anna skipti um skoðun og að það eigi eftir að koma í ljós hvort hún mæti sjálf á félagsfundinn. .

„Hún er bara að reyna að losna við alla sem eru á annarri skoðun en hún. Allir eru hneykslaðir út af þessu, þetta er bara svívirðilegt,“ segir Agnieszka.

Þá segist hún ekki viss um að stjórnin geti almennt endurskoðað sína ákvörðun en fullyrðir að málið verði rætt á fundinum.

Hættulegt fordæmi

Í tilkynningu frá Önnu Sigurlínu Tómasdóttur, trúnaðarmanni hjá Kjörís, kemur fram að 493 félagar hafi í heildina skrifað undir og voru undirskriftirnar afhentar skrifstofu Eflingar í dag. 

 „Nauðsynlegt er að fram fari umræða innan félagsins meðal félagsmanna um hversu hættulegt fordæmi stéttarfélagið setur með beitingu hópuppsagnar með þessum hætti,“ segir í tilkynningunni.

Þá segir að það dragi alvarlega úr trúverðugleika stéttarfélagsins og getu þess til að standa vörð um hafsmuni félagsfólks með því að beita hópuppsögn með þessum hætti.

„Fjöldi félagsfólks sem flest er verkafólk kom að því að safna undirskriftunum og undirtektir voru almennt góðar. Enda hinum almenna félagsmanni félagsins ekki sama um vegferð og afdrif síns félags,“ segir enn fremur í tilkynningunni.

Fréttin hefur verið uppfærð.