Tekst Óskari Hrafni loksins að vinna KR í kvöld?

Eins og flestir vita þá er þjálfari Breiðabliks Óskar Hrafn Þorvaldsson sem er uppalinn KR-ingur og lék á sínum tíma 71 leik með KR í efstu deild.

Óskar Hrafn tók við liði Breiðabliki fyrir 2020 tímabilið og þetta er því þriðja tímabil hans með Kópavogsliðið.

Blikar hafa unnið margra flotta sigra undir hans stjórn en þeir hafa hins vegar enn ekki unnið KR síðan að Óskar Hrafn tók við sem þjálfari Blikaliðsins.

Breiðablik hefur spilað fimm leiki á móti KR í deild og bikar síðan í upphafi 2020 tímabilsins og uppskeran er aðeins eitt stig og fjórir tapleikir. Markatalan er jafnframt átta mörk í mínus hjá Blikum því KR-ingar hafa skorað tólf mörk gegn aðeins fjórum í þessum innbyrðis leikjum liðanna.

Það jákvæða fyrir Blika er að þeir náðu í stig í síðasta leik sem var deildarleikur á Meistaravöllum í júlí í fyrra. Liðin gerðu þá 1-1 jafntefli eftir að Höskuldur Gunnlaugsson jafnaði metin í seinni hálfleik.

Blikar voru reyndar byrjaðir á þessum vandræðum með KR áður en Óskar Hrafn tók við liðinu. Blikar unnu síðast KR í deild eða bikar 7. ágúst 2018 en eru nú án sigur á móti Vesturbæjarliðinu í sjö leikjum (1 jafntefli og 6 töp).

Nú er að sjá hvort Óskari Hrafni takist loksins að vinna KR í kvöld. Leikurinn hefst klukkan 18.00 og verður sýndur beint á Stöð 2 Sport.