Fyrsta skrefið í átt að stækkun Jarðbaðanna tekið

Ný bygging og stækkað lón verður austan við núverandi aðstöðu og er um 2.300 femetrar að stærð.

Ný aðstaða mun innihalda veitingarými, aðstöðu til fundarhalda, inni- og útiklefa, slökunarrými og nuddaðstöðu. Byggingin verður á einni hæð og lónið aðlagað að henni þannig að gestir geti farið beint ofan í, ásamt því að upplifunarsvæðum í lóninu verður fjölgað.

Hönnuðir eru Basalt arkitektar, Design Group Italia og Efla verkfræðistofa.

Markmið eigenda er, að því er fram kemur í tilkynningu, að auka vellíðan gesta og skapa ferðalag í gegnum lónið þar sem gesturinn upplifi mikla nálægð við náttúruna í einstöku umhverfi og með mikilfenglegt útsýni Mývatnssveitar fyrir augum.

Stefnt er að opnun á fyrsta ársfjórðungi 2024.