Fossar og furðuverk sameinast í sendiráðinu

Dóra Júlía Agnarsdóttir skrifar 17. maí 2022 15:31

Jón Sæmundur og Þurý Björk á opnuninni. Aðsend

Listamaðurinn Jón Sæmundur stendur fyrir málverkasýningunni Fossar og Furðuverur í íslenska sendiráðinu í Bretlandi um þessar mundir. Á sýningunni blandar Jón saman seríum sem hann hefur verið að vinna að undanfarið en viðfangsefnið er fossar og önnur furðuverk, sem hafa lengi verið Jóni hugleikin. Blaðamaður heyrði í Jóni og fékk nánari innsýn í innblástur hans.

Tenging við barnæskuna

View this post on Instagram

A post shared by Jón Sæmundur (@jonsaemundur)

Jón segir hugmyndina að sýningunni hafi kviknað síðastliðin jól.

„Ég var búinn að taka eftir sýningu í sendiráðinu hjá Hendrikku Waage síðastliðinn nóvember, fór að forvitnast og í kjölfarið bauð Þurý mér að setja upp sýningu.“

Fyrir Jóni Sæmundi er listsköpun andleg iðkun, leikur og tenging við náttúruna og heiminn í kring. Frá barnæsku hafa fossarnir náð til Jóns, en að ungum aldri eyddi hann mörgum sumrum á Kleifárvöllum í Miklaholtshreppi með fjölskyldu sinni. Í fjallinu fyrir ofan bæinn runnu þrír fossar úr einum hamri og lýsir Jón þessu sem einkaleikvelli sínum sem barn.

Jón Sæmundur ásamt Sturlu Sigurjónssyni sendiherra í Bretlandi og eiginkonu hans, Elínu Jónsdóttur.Aðsend

Fossar í ólíkum formum

Undanfarna áratugi hefur hann reglulega málað Gullfoss í mismunandi útgáfum sem og aðra íslenska fossa en hann hefur einnig safnað gömlum svarthvítum póstkortum af íslenskum fossum og landslagi. Nýverið hóf hann að útfæra þau í málverk og silkiþrykk á bæði við og striga. Ásamt því hefur hann ferðast um Ísland og tekið upp myndbönd og hljóð af fossum og má segja að fossarnir heilli hann upp úr skónum.

Jón Sæmundur og Tayba Mason, PR fulltrúi Jóns úti.Aðsend

„Ég varpaði fossi á gömlu Morgunblaðshöllina árið 2002 með hljóði og kom hann virkilega vel út. Ég vildi endurtaka leikinn núna með því að varpa nýju verki af Gullfossi utan á Dönsku sendiráðsbygginguna í London. Þetta er svört bygging hönnuð af Arne Jacobsen og hentar vel til verksins. Danirnir tóku vel í þetta en leyfið frá eiganda garðins fyrir framan fékkst ekki í tæka tíð, en gæti komið síðar,“ segir Jón að lokum.