Deschamps yfirgaf franska hópinn vegna andláts föður síns

Noel Le Graet, forseti franska knattspynusambandsins, staðfesti fregnirnar og vottaði þjálfaranum samúð sína.

„Okkur bárust þær sorglegu fréttir að faðir Didiers hafi látist í morgun. Didier fór til að vera með ættingjum sínum og ég fullvissa hann um vináttu mína og stuðning á þessum erfiðu tímum,“ sagði Le Graet.

Frakkar mæta Dönum á Stade de France í Þjóðadeildinni næstkomandi föstudag, en ekki er víst hvort Deschamps verði á hliðarlínunni í þeim leik. Guy Stephan, aðstoðarþjálfari liðsins, stjórnaði æfingunni í dag.

Franska liðið leikur fjóra leiki á ellefu dögum í þessum landsleikjaglugga. Ásamt því að mæta Dönum leikur liðið í tvígang gegn Króötum og einn leik gegn Austurríkismönnum.