Loks vann Leiknir, Stjarnan bjargaði stigi líkt og KA

Loksins vann Leiknir Reykjavík leik en liðið lagði ÍA 1-0 í Breiðholti. Mikkel Elbæk Jakobsen með eina mark leiksins á 65. mínútu. Undir lok leiks ætlaði allt að sjóða upp úr er Kaj Leo í Bartalstovu og Maciej Makuszewski létu báðir reka sig af velli.

Á Akureyri var Valur í heimsókn. Eftir markalausan fyrri hálfleik þá kom Tryggvi Hrafn Haraldsson gestunum yfir á 64. mínútu. Aðeins fjórum mínútum síðar voru Valsarar orðnir manni færri en Guðmundur Andri Tryggvason fékk beint rautt spjald. Það nýttu heimamenn sér en Nökkvi Þeyr Þórisson jafnaði metin þegar átta mínútur voru til leiksloka og lauk leiknum með 1-1 jafntefli.

Í Hafnafirði mættust FH og Stjarnan. Þar var einnig markalaust í hálfleik en Steven Lennon kom FH yfir snemma í síðari hálfleik. Það stefndi í 1-0 sigur heimamanna en Adolf Daði Birgisson var ekki á sama máli. Gestirnir fengu hornspyrnu og eftir atgang í teignum þá kom Adolf Daði knettinum í netið, lauk leiknum því einnig með 1-1 jafntefli.