Sjáðu magnaðar móttökur Dybala í Róm sem meira en tólf milljónir hafa horft á

Yfir tíu þúsund stuðningsmenn Rómarliðsins mættu á Palazzo della Civiltà torgið í Róm til að bjóða Dybala velkominn í félagið.

Hér fyrir neðan má sjá stuðningsmennina syngja til Dybala sem veit ekki alveg hvernig hann á að haga sér einn á sviðnu.

Dybala kom til Roma á frjálsri sölu eftir að samningur hans við Juventus rann út.

Þessar mögnuðu móttökur vöktu líka mikla athygli á netmiðlum og yfir tólf milljónir manna horfðu á myndband af þeim á Twitter á fyrstu tíu klukkutímunum.

Hinn 28 ára gamli Dybala hafði spilað með Juve frá árinu 2015 en þar áður var hann hjá Palermo. Hann hefur spilað á Ítalíu frá því að hann var nítján ára gamall.

Dybala skoraði 10 mörk í 29 deildarleikjum á síðustu leiktíð en var alls með 82 mörk í 210 leikjum fyrir Juventus í Seríu A.