Hörður dæmdur í þriggja ára fangelsi fyrir kyn­ferðis­brot gegn börnum

Dagmar Ösp Vésteinsdóttir, sem sótti málið gegn Herði fyrir hönd ákæruvaldsins, staðfestir þetta í samtali við fréttastofu. Dómurinn hefur ekki enn verið birtur en það er dómari sem ákveður hvenær dómar eru birtir. DV greindi fyrst frá og hafði niðurstöðuna eftir móður eins brotaþola Harðar.

Dagmar Ösp segist ekki geta tjáð sig frekar um efni dómsins né hvort ákæruvaldið muni áfrýja honum eða una niðurstöðunni. Sú ákvörðun sé á hendi ríkissaksóknara.

Sakfelldur fyrir brot gegn sextán stúlkum

Hörður var handtekinn fyrir rétt rúmlega ári síðan fyrir að hafa sett sig í samband við fimm ólögráða stúlkur, klæmst við þær og reynt að fá þær til að hitta sig. Honum var sleppt úr haldi en hélt áfram að brjóta af sér með sams konar hætti.

Hann var svo úrskurðaður í gæsluvarðhald þann 9. desember í fyrra sem var síðan ítrekað framlengt vegna þess að hann var talinn líklegur til að halda uppteknum hætti yrði honum sleppt úr haldi.

Hörður var upphaflega ákærður fyrir brot gagnvart sjö stúlkum með því að hafa viðhaft við þær kynferðislegt tal og sent sumum þeirra einnig kynferðislegar myndir og í tvö skipti gert tilraun til að mæla sér mót við þær. Þann 29. mars gaf saksóknari út aðra ákæru vegna gruns um sambærileg brot gegn níu stúlkum til viðbótar. Þá var hann ákærður fyrir vörslu á barnaníðsefni. Hann var sakfelldur í öllum ákæruliðum að sögn saksóknara.

Rannsóknarlögreglumaður sem villtist af réttri braut

Hörður var rannsóknarlögreglumaður hjá ríkislögreglustjóra um árabil en eftir að hann lét af störfum hjá lögreglunni tók að halla undan fæti.

Hann var til að mynda einn þeirra sem fréttaskýringaþátturinn Kompás fjallaði um í þætti sínum árið 2006 um karlmenn sem áttu í kynferðislegum samskiptum við börn á netinu. Í þættinum var hann kallaður fíkusbenjamín; en það er nafnið sem hann notaði þegar hann setti sig í samband við unglingsstúlkur.

Þá var hann árið 2009 handtekinn í Argentínu með fimm kíló af kókaíni í fórum sínum.