Napoli fær vænan liðsstyrk

Framherjinn Giovanni Simeone, sonur Diego Simeone, þjálfara Atlético Madrid, hefur gengið í raðir Napoli á láni frá Hellas Verona. Simeone var öflugur hjá Verona í Seríu A á síðustu leiktíð þar sem hann skoraði 17 mörk í 35 leikjum. Hann hefur áður leikið með Cagliari, Fiorentina og Genoa í efstu deild á Ítalíu,

Napoli á þá kost á að festa alfarið kaup á Simeone þegar lánssamningnum lýkur en hann mun veita Nígeríumanninum Victor Osimhen samkeppni um framherjastöðuna.

Þá er Frakkinn Tanguy Ndombele einnig kominn á láni frá Tottenham. Hann var áður á láni hjá Lyon á seinni hluta síðustu leiktíðar en Antonio Conte, þjálfari Spurs, hefur engin not fyrir hann.

Ndombele var keyptur til Tottenham frá Lyon á rúmlega 60 milljónir punda sumarið 2019 en hefur ekki staðið undir væntingum í Lundúnum þar sem menn hafa beðið eftir að hann springi út. Napoli greiðir eina milljón evra fyrir lánssamninginn og á kost á að kaupa Ndombele á 30 milljónir evra næsta sumar.

Napoli vann sinn fyrsta leik í ítölsku A-deildinni síðustu helgi, 5-2 gegn Verona. Liðið mætir nýliðum Monza á heimavelli klukkan 16:30 á morgun en leikurinn verður sýndur beint á Stöð 2 Sport 2.

Allir tíu leikir umferðarinnar á Ítalíu verða að venju í beinni útsendingu á rásum Stöðvar 2 Sport. Mikael Egill Ellertsson verður í eldlínunni með Spezia gegn Inter í dag klukkan 18:45 og Þórir Jóhann Helgason á sama tíma með Lecce gegn Sassuolo.

Leikir helgarinnar á Ítalíu

Laugardagur

16:30 Torino - Lazio (Stöð 2 Sport 2)

16:30 Udinese - Salernitana (Stöð 2 Sport 3)

18:45 Inter - Spezia (Stöð 2 Sport 2)

18:45 Sassuolo - Lecce (Stöð 2 Sport 3)

Sunnudagur

16:30 Napoli - Monza (Stöð 2 Sport 2)

16:30 Empoli - Fiorentina (Stöð 2 Sport 3)

18:45 Atalanta - AC Milan (Stöð 2 Sport 2)

18:45 Bologna - Verona (Stöð 2 Sport 3)

Mánudagur

16:30 Roma-Cremonese (Stöð 2 Sport 2)

18:45 Sampdoria - Juventus (Stöð 2 Sport 2)