Viðskipti innlent

Kon­ráð til að­stoðar SA í kjara­við­ræðunum fram­undan

Atli Ísleifsson skrifar
Konráð S. Guðjónsson hefur að undanförnu starfað sem aðalhagfræðingur Stefnis hf.
Konráð S. Guðjónsson hefur að undanförnu starfað sem aðalhagfræðingur Stefnis hf.

Konráð S. Guðjónsson, aðalhagfræðingur Stefnis, hefur tímabundið verið ráðinn sem efnahagsráðgjafi Samtaka atvinnulífsins í aðdraganda komandi kjarasamningsgerðar. Hann mun jafnframt taka sæti í samninganefnd SA.

Í tilkynningu á vef SA segir að Konráð taki til starfa 1. september, en hann mun snúa aftur í starf aðalhagfræðings Stefnis að loknum störfum sínum fyrir SA.

„Áður starfaði Konráð sem hagfræðingur og aðstoðarframkvæmdastjóri Viðskiptaráðs Íslands. Þá starfaði hann í greiningardeild Arion banka, hjá Hagfræðistofnun og við þróunarsamvinnu Í Úganda og Tansaníu. Hann hefur einnig sinnt kennslu við Háskóla Íslands og Endurmenntun Háskóla Íslands. Konráð er með meistaragráðu í hagfræði frá Warwick háskóla í Bretlandi og B.Sc. gráðu í hagfræði frá Háskóla Íslands,“ segir um Konráð í tilkynningunni.

Haft er eftir Halldóri Benjamín Þorbergssyni, framkvæmdastjóra SA, að það sé mikill styrkur að fá Konráð tímabundið til liðs við SA enda sé umfangsmikið verkefni framundan. „Við væntum mikils af honum og þekkjum vel til hans starfa í gegnum tíðina.“

Vistaskipti Kjaramál Vinnumarkaður


Mest lesið


Fleiri fréttir

Sjá meira


×

Mest lesið