Katrín segir upp störfum hjá SFF

Tekur uppsögn hennar gildi þann 1. september næstkomandi. Katrín mun starfa áfram þar til ráðning nýs framkvæmdastjóra liggur fyrir. Stjórn SFF mun auglýsa starfið fljótlega.

„Árin mín hjá samtökunum hafa verið ótrúlega gefandi, krefjandi og skemmtileg. Er það ekki síst vegna þess að í fjármála- og vátryggingageiranum starfar mikið af góðu fólki sem ég hef átt afar gott samstarf við. Eru mér þar minnistæðust snör viðbrögð þeirra þegar heimsfaraldurinn skall á. Viljanum til að ganga eins langt og framast var unnt, til að verja heimili og störf, í miðri óvissunni, gleymi ég seint,“ segir Katrín sem var iðnaðarráðherra í ríkisstjórn Jóhönnu Sigurðardóttur á árunum eftir hrun. 

„Fjármálafyrirtæki gegna vaxandi og mikilvægu hlutverki í okkar samfélagi og það skiptir okkur öll máli að þau hafi styrk til að styðja við fólk og fyrirtæki við ólíkar aðstæður. Ég kveð samtökin með söknuði og þakklæti en einnig tilhlökkun yfir því sem fram undan er.“

Hún segir í færslu á Facebook ætla að líta upp úr dagsins önn, anda djúpt og leita nýrra ævintýra.

Lilja Björk Einarsdóttir, stjórnarformaður SFF og bankastjóri Landsbankans, segir stjórn þakka Katrínu kærlega fyrir vel unnin störf.

„Það eru 25 aðildarfélög innan samtakanna og Katrín hefur haldið vel utan um starfsemina undanfarin ár og jafnframt átt gott samstarf við ýmsa hagsmunaaðila og stjórnvöld.“