Selenskí varar inn­rásar­her­menn í Kher­son við yfir­vofandi gagn­á­rásum

Kherson var fyrsta stórborgin sem féll í hendur óvinarins eftir að Rússar hófu innrás sína í febrúar síðastliðnum.

Breska varnarmálaráðuneytið segir í daglegri stöðuuppfærslu að Rússar freisti þess nú að endurskipuleggja varnir sínar umhverfis borgina en Bretarnir segja sveitir Rússa undirmannaðar og háðar viðkvæmum birgðarlínum.

Yfirvöld í Rússlandi hafa gengist við því að hafa orðið fyrir gagnárás af hálfu Úkraínumanna en segjast hafa tekið á móti og fjöldi Úkraínumanna fallið.

Ráðamenn í Úkraínu hafa ekki viljað gefa of mikið upp um áætlanir sínar en Vólódimír Selenskí Úkraínuforseti hefur varað við því að þeir rússnesku hermenn sem staddir eru í Kherson verði nú að gera upp við sig hvort þeir vilja bjarga lífi sínu og flýja ellegar eiga það á hættu að láta lífið í gagnárásinni.

Forsetinn var vígreifur í gærkvöldi og sagði landamæri Úkraínu og Rússlands ekki hafa breyst. 

„Þetta mun gerast. Þetta er okkar. Og rétt eins og samfélag okkar skilur það þá vil ég að innrásarherinn skilji það líka. Það er enginn staður fyrir þá á úkraínskri jörðu,“ sagði Selenskí.